**كاسانو**قصه مسلسله

(الحلقة الرابعة)

سمع يوسف رنين هاتفه الخلوى يشير الى اتصال نور .. فنظر الى حسام :
- أنا خلاص لقيت البنت ..
حسام فى دهشة :
- مين هى البنت !!!
يوسف :- فاكر البنت اللى قلت لكم أنى أنقذتها فى شرم الشيخ ؟ ..
حسام ومازالت الدهشة تسيطر عليه :
- اللى ضيعت عليك المهمة !!

يوسف : - أيوة هى .. بس دلوقتى دى أنسب واحدة ..
حسام :- ازاى ؟
يوسف :- اللى احنا عاوزينه مجرد بنت تدخل معايا الحفلة و خلاص .. و البنت
دى عبيطة و ساذجة .. و أنا شايف أنها مناسبة جدا .. رغم أن كلامها كتير و
هتخنقنى ..

حسام :- و ازاى هتقنعها تدخل معاك الحفلة ؟

يوسف فى ثقة :
- الحفلة لسة عليها شهر .. و كلمتين حب مع كم نظرة من نظراتى .. هتوافق تطلع معايا القمر ..


ضحك حسام و يوسف ضحكات ساخرة بعدما قرر يوسف أن يستغل سذاجة نور و براءتها .. حتى نظر اليه حسام مرة أخرى :
- طيب كدة لسة لنا مشكلة ..
يوسف :- قصدك السلاح ؟
حسام :- اه ..

فكر يوسف قليلا بعدها نظر الى احدى الصور القديمة المتواجدة أمامه .. و كانت صورته هو و أحد أصدقاءه القدامى .. فنظر الى حسام :

- مفيش غيره هيعرف يحل المشكلة دى ..
حسام و قد تغير لون وجهه :
- قصدك !!!!
يوسف فى ابتسامة :
- أيوة .. المهندس مروان ..
حسام :- لا .. ده مجنون .. ده طول عمره فاشل ..
يوسف :- بالعكس .. ده صديق عمرى .. و أنا اكتر واحد أعرف أنه عبقرى .. و فى نفس الوقت انسان أثق فيه ..



*********


بعدها استقل يوسف سيارته متجها الى ذلك المهندس الذى يثق فى قدراته .. و
يضع أملا فى مقدرته على ايجاد حلا لتلك المشكلة .. و قد وصل الى بيته الذى
يبدو قديما و يوشك على الانهيار .. و صعد درجات السلم المتهدمة بعض الشئ
.. و ما ان اقترب من باب الشقة التى يسكن بها حتى فتح تلقائيا .. فابتسم
يوسف :

- هو ده المهندس مروان و عبقريته ..

بعدها دخل تلك الشقة التى تختلف تماما عن ظاهر البيت من حيث التنظيم و كم الاجهزة التى توجد بها .. حتى سمع صوتا من خلفه :
- يوسف .. يوسف صابر البحيرى ..
فالتفت يوسف فى ابتسامة :
- صديق عمرى .. العبقرى مروان الدسوقى .. بعدها احتضنه .. و قد رحب به مروان ترحيبا كثيرا .. و بعد ذلك الترحيب ..

مروان :- بس أيه اللى فكرك بيا .. أكيد فى حاجة مهمة ..
يوسف و كانه لا يريد أن يضيع وقتا :
- أنا محتاج عبقريتك معايا ..
مروان فى دهشة :
- عبقريتى !!
يوسف :- أيوة .. أنا عاوز سلاحى يمر من بوابة الكترونية من غير ما يكتشف ولا يحصل مشاكل .. و خصوصا أنها حفلة متأمنة تأمين كويس ..

مروان فى قلق :
- سلاح !! .. أنت ناوى على أيه ؟!
يوسف :- مش مهم تعرف أنا ناوى على أيه ..

صمت مروان قليلا :
- أنا آسف يا يوسف .. أنا مقدرش أساعدك ..
يوسف :- دى مش مساعدة .. دى صفقة ... ثم أخرج مظروف يحتوى على نقود كثيرة ..
:- ده جزء من المبلغ .. وباقى المبلغ بعد ما تحل لى المشكلة ..

نظر مروان الى النقود و قد لمع بريق عينيه :
- و أنت محتاج ردى امتى ؟
يوسف :- أسبوعين ..
مروان :- أسبوعين بس .. أنا محتاج وقت أطول ..
يوسف :- هما أسبوعين مفيش غيرهم ..
أخذ مروان النقود بيده و ابتسم :
- اعتبر الحل وصلك ..



*********


غادر يوسف بيت ذلك المهندس .. و كم كانت ثقته فى قدراته كبيرة .. بعدها
أخذ يفكر فى نور .. و كيف يقتحم حياتها بعدما جعلها تشعر أنه لا يطيقها ..

ظل يوسف يفكر كثيرا .. حتى أمسك بهاتفه الخلوى ليقوم بالاتصال بأحد الاشخاص :

- نور .. أنا يوسف ..
نور :- ما أنا عارفة انك يوسف .. بس أنا مش مصدقة نفسى .. ده أنا اتصلت بك كتير أوى و استنى رد منك .. و لا أنت هنا ..
يوسف :- آسف .. كنت مشغول الفترة اللى فاتت ..
نور : - اه .. ده أنت مهم بقى ..
صمت يوسف قليلا :
- نور .. عاوز أشوفك ..
نور فى فرحة :
- تشوفنى !! يوسف أنت طبيعى ؟!
يوسف :- مش موافقة و لا أيه !!
نور :- لا .. طبعا موافقة ..
يوسف :- اسمحيلى أعزمك على العشا النهاردة ..
نور :- و عشا كمان .. هو أنا بحلم ؟!!



**********


وافقت نور على دعوة يوسف لحفل العشاء باحدى المطاعم الراقية .. و رغم أن
يوسف لا يطيقها الا أنه قد عزم على تحمل فضولها .. و قد استعد جيدا لهذا
العشاء .. و اتجه الى هناك قبل أن تصل نور ..

بدأ الوقت يمر .. و نور لم تصل فى موعدها .. و قد شعر يوسف بالغيظ .. و ظل يحدث نفسه :

- أنا عارف .. ازاى هعتمد على واحدة زى دى !!

و كاد أن ينصرف .. حتى وجد فتاة ترتدى نظارة بصرية تقترب منه .. ففوجئ بأنها نور ..

نور :- أنا آسفة على التأخير .. بس أنت عارف .. الطريق زحمة .. ثم جلست ..

تنهد يوسف :
- و لا يهمك .. المهم انك جيتى .. ثم أكمل حديثه و كأنه مندهش من هيئتها المختلفة :
- انتى بتلبسى نضارة ؟!!
نور :- اه .. نظرى ضعيف شوية .. و بعدين أصحابى بيقولوا ان النضارة حلوة عليا ..
يوسف :- اه .. فعلا ..
نور فى فرحة :- بجد حلوة ؟
يوسف :- أيوة حلوة ..
ثم نظر اليها مرة أخرى :
- نور .. أنا آسف على الطريقة اللى كلمتك بها و احنا راجعين من شرم الشيخ ..
نور وقد قطب وجهها :
- و أنا مش قابلة أسفك ..
يوسف :- أيه ؟
ضحكت نور :- لا , أنا بهزر .. أنا اللى آسفة على المشاكل اللى عملتها لك
هناك .. و تعبك بسببى .. بس أعمل أيه ساعات بكون مجنونة .. ثم ضحكت مرة
أخرى ..

ضحك يوسف .. وهو يقول فى نفسه :
- ساعات !! ده على طول ..



*********


ظل يوسف يبحث عن بعض الكلمات يضيع بها الوقت .. و لكنه لا يجد و يظل صامتا
.. و نور تتحدث .. حتى انتهيا من العشاء .. بعدها قاما ليكملان حديثهما
أثناء سيرهما تحت أضواء شوارع القاهرة الليلية ..

نور :- هو أنت ربنا خلقك كدة .. كلمتين و تسكت !!
يوسف :- أنا !!
نور :- اه .. انت شكلك كدة أخدت صدمة كبيرة فى حياتك .. قولى .. قولى ..

يضحك يوسف و لا يتحدث .. و نور تكمل :
- اه .. عشان كدة خايف تقرب من أى بنت .. أنا اخصائية نفسية و أفهم فى الحاجات دى ..

يوسف :- انتى كدة اثبتى أنك و لا تفهمى أى حاجة ..
ضحكت نور :- طيب اتكلم شوية .. كلمنى عن نفسك ..

نظر يوسف الى نور :
- أنا يوسف ..
قاطعته نور :- لا .. جديدة ..

أكمل يوسف حديثه ما بين صدق وما بين ما اختلقه من خياله :
- من أب مصرى .. و أم ايطالية .. كنت بطل رماية .. و مفيش حد كان يسبقنى .. بس بطلت اللعبة ..
نور :
- ليه ؟
يوسف :- ليه أيه ؟
نور :- ليه بطلت اللعبة ؟
يوسف :- اه .. انتى عارفة هنا مفيش أى اهتمام بالرياضة .. فقلت أبطل أحسن
.. و عمرى ما كنت شاطر فى المدرسة .. و والدى ترك لى ثروة قبل ما يموت و
أنا عايش منها ..

نور :- أنا بقى عكسك خالص ..
أكملت :- أنا طول عمرى متفوقة فى الدراسة .. و لما جبت مجموع فى الثانوية
دخلت أداب علم نفس لأنى بحب التعمق فى الشخصيات .. و خلصت الكلية بتفوق ..


يوسف :- و ناوية على أيه ..
نور :- أنا هبدأ فى تحضير رسالتى ..
يوسف فى ابتسامة :
- وعن أيه الرسالة دى ..
نور :- رسالتى عن السلوك المرضى للقاتل ..
نظر يوسف اليها فى لهفة :
- أيه !!! .. ثم تمالك نفسه :
- قصدى .. ليه الرسالة دى بالذات ؟

صمتت نور قليلا بعدها نظرت اليه :
- يوسف .. أنا بابا كان طول عمره فى حاله .. و مع ذلك مات مقتول ...

(الحلقة الخامسة)

فوجئ
يوسف بـ نور تخبره عن تلك الرسالة التى تود أن تكمل بها دراستها العليا ..
و تخبره بأن والدها قد مات مقتولا .. فنظر اليها فى لهفة :

- باباكى مات مقتول !!!
نور و قد بدأ الحزن يظهر عليها :
- أيوة .. من حوالى خمس سنين .. رغم أنه طول عمره كان فى حاله .. و لا عمره سبب أذى لأى حد ..
يوسف و قد بدأ يهتم :
- وعرفتوا مين اللى قتله ؟
هزت نور رأسها :
- لا .. و فى الأخر القضية اتسجلت ضد مجهول ..

أكملت :- لو تعرف حبى لبابا كان أد أيه .. تعرف أد أيه نفسى أشوف اللى قتله ...

ثم أخرجت صورة من معها :
- دى صورته .. عمرها ما فارقتنى ..

نظر يوسف جيدا الى الصورة .. حتى قاطعته نور :
- قولى بقى .. لو كنت قاتل , كان سلوكك هيبقى عامل ازاى ؟
ابتسم يوسف :
- أنا .. لا .. قاتل أيه !!
نور :- تخيل بس لو كنت قاتل ..
صمت يوسف قليلا :
- أكيد هو انسان عادى ..
نور فى غضب :
- لا مش عادى طبعا .. ده انسان مريض .. و عنده نقص .. و طول عمره جبان ..
أنا مش عارفة ازاى بيجى له قلب و هو بيقتل نفس بشرية .. ده الحيوان أحسن
منه ..

تمالك يوسف نفسه .. ثم ابتسم ابتسامة مصطنعة :
- اه .. عندك حق ..

بعدها واصلا حديثهما و سيرهما .. حتى ودعها يوسف .. فنظرت اليه نور :
- أنا متشكرة جدا على دعوة العشا .. و بجد أنا سعيدة أوى أنى كنت معاك ..
يوسف فى لؤم :
- و أنا كنت أسعد ..



*********


عاد يوسف الى بيته .. و مازالت صورة والد نور فى خياله لا تفارقه .. و
يخشى من الصدف التى تكررت كثيرا مع نور .. و أن يكون هو قاتل أبيها ..

بعدها بدأ يبحث عن صورة أبيها بين الصور .. التى يحتفظ بها لضحاياه .. فى
حاسبه الشخصى .. و ظل يبحث حتى انتهى .. و قد تنفس الصعداء حينما لم يجد
صورته بينهم .. و لكنه مازال يتذكر نور حين كانت تقول :

- القاتل ده انسان مريض .. عنده نقص ..
- طول عمره جبان ..
- ده الحيوان أحسن منه ..

حتى وجد كل من حسام و منال يأتيان اليه ..
حسام فى دعابة :- الرومانسى .. كاسانو ..
يوسف :- اسكت .. رومانسى أيه .. ده أنا اتخنقت ..
منال :- ياه .. هى مقرفة للدرجة دى ..
يوسف :- ده لسانها ان سكت لحظة تموت .. طول ما احنا مع بعض كلام كلام ..
ثم ضحك :- و أيه .. بتحضر رسالة عن القاتل و سلوكه ..

ضحكوا جميعا فى سخرية وقد نظرت اليه منال :
- و أكيد طبعا سألتك .. لو كنت تعرف حد من اللى بيقتلو الناس ..
يوسف :- أنا أعرف حد !!! .. ده أنا ملاك ..
حسام :- أنت اللى اخترتها .. يبقى تتحملها ..
يوسف :- ده الشهر ده هيعدى كأنه سنة .. بس المهمة دى لى رد اعتبار أكتر ما تكون فلوس .. وهنفذها يعنى هنفذها ..



*********


بدأت الأيام تمر .. و ازدادت المقابلات بين يوسف و نور .. و بدأت نور تشعر
بسعادة غامرة .. و يوسف ينتظر مرور الأيام بكل سرعة ..حتى يأتى يوم تنفيذ
جريمته ..

حتى جاء اليوم الذى كان فيه يوسف و نور يسيران باحدى الشوارع القريبة من
مسكن نور .. و فوجئ الاثنان بكمية هائلة من الماء تسقط فوقهما .. و صوت
سيده من أعلى :

- أنا آسفة .. مكنتش أقصد ..
يوسف فى غضب بعدما أغرق الماء رأسه و ملابسه :
- آسفة أيه يا ست أنتى .. ثم بدأ يشم رائحة الماء ..
يوسف :- كمان ميا مش نضيفة ..

نور ولا تستطيع أن تتمالك نفسها من الضحك .. و لا تبالى أن الماء أغرقها هى الأخرى :
- الست مش قاصدة يا يوسف .. ثم تضحك
أكملت :- أنا شقتى فى الشارع الجاى .. تعالى بسرعة أنشف هدومك قبل ما
يجيلك برد .. ما أنا عارفة البرد بتاعك .. فاكر !! .. و ترجع تقول أنا
السبب ..

يوسف و كانه يريد أن يتخلص منها :
- لا .. مش مشكلة .. و بعدين مش أنتى قاعدة لوحدك !!
نور :- اه .. ماما قاعدة فى البلد ..
يوسف و كأنه مندهش :
- طيب آجى معاكى ازاى ..
نور فى دعابة :
- مانا قلت لك قبل كدة .. معايا الحزام الأسود فى الكارتيه .. يلا .. أصلى أنا مش همشى معاك بالريحة دى ..



*********


اتجه يوسف مع نور الى شقتها .. بعدما ألحت نور الحاحا شديد .. وعندما وصلا تلك الشقة .. نظرت اليه نور :

- تعرف .. ماما لو عرفت أن راجل غريب دخل الشقة .. كانت قتلتنى ..
يوسف :- ما أنا بقول أمشى أحسن ..
نور :- لا .. ماما هتعرف منين ..

بعدها أحضرت لـ يوسف ملابس كانت لوالدها .. و طلبت منه أن يبدل ملابسه المبللة ..
نور :- شوف بقى هدوم بابا هتيجى على قدك ؟
يوسف فى دهشة :- باباكى !!
نور :- اه ..
يوسف ومازالت الدهشة على وجهه :
- اللى مات مقتول !!!
نور فى حزن .. و قد بدأت الدموع تملأ عينيها :
- اه
أخذ يوسف الملابس منها بعدما شعر بحزنها :
- أنا آسف ..
مسحت دموعها :- و لا يهمك ..



.........


بعدها ارتدى يوسف ملابس والدها التى كانت واسعة الى حد ما .. و بدلت نور هى الأخرى ملابسها .. و بعد فترة صمت قليلة نظرت اليه :

- يوسف .. تعرف أنك أول واحد يهتم بيا ..
يوسف :- أيه !!
نور :- أيوة .. أنقذتنى مرتين من غير ما تعرف مين أنا ..
يوسف فى ابتسامة :
- بس أى حد مكانى كان هيعمل كدة ..
نور :- القارب كان مليان ناس .. و الحفلة كمان .. و مع ذلك أنت الوحيد اللى انقذتنى ..

أكملت :- أنا كنت طول عمرى مستنية حد يهتم بيا .. حتى لو عطف عليا مش هقول
لا .. زى البنت اللى بتحلم بقصة حب و فارس يجى يخطفها على حصانه ..

شرد ذهن يوسف قليلا مع كلامها .. حتى حدث نفسه :
- فوق يا يوسف .. أنت هتسرح و لا أيه ..
أكملت :
- عشان كدة أنا مش خايفة و احنا الاتنين مع بعض ..
ثم نظرت الى يوسف :
- يوسف .. أنا بتكلم من الصبح .. و أنت ساكت .. اتكلم ..
نظر اليها يوسف :
- الهدوم نشفت ولا لسة ؟
نور :- هو ده اللى ربنا قدرك عليه .. طيب .. أنا هقوم أشوفهم نشفوا .. و لا لأ ..

فى تلك اللحظة ظل يوسف يفكر كيف يغادر تلك الشقة .. بعدما شعر بأن نور قد
أخذها تفكيرها بعيدا .. فأخرج هاتفه الخلوى كأنه تلقى اتصالا من أحد
أصدقائه :

- محتاجنى .. ضرورى ... ( و هو لا يكلم أحدا )
- طيب مسافة الطريق .. و هكون عندك ..

عادت نور .. و تنظر اليه وهو يتحدث .. فنظر اليها :
- آسف يا نور .. جالى اتصال ضرورى .. و لازم أمشى ..
نور :- بس هدومك لسة عليها ميا ..
يوسف :- مش مهم .. هتنشف لوحدها .. بعدين الجو حر ..
نور بعدما أحست برغبته فى المغادرة :
- طيب .. زى ما تحب ..

بعدها ارتدى ملابسه المبللة مرة أخرى .. و غادر شقة نور .. بعد أن أوهمها بذلك الاتصال الذى لم يحدث ..



*********


تمر الأيام يوما بعد يوم .. حتى جاءه اتصال من المهندس مروان .. يخبره
بأنه قد وجد حلا .. و على الفور استقل يوسف سيارته متجها الي بيته .. و ما
ان وصل اليه .. حتى سأله فى لهفة :

- أنت لقيت الحل بالسرعة دى !!
مروان فى ثقة :
- أيوة .. لقيت الحل ..
يوسف :- ازاى سلاحى هيمر من بوابة الكترونية ؟
ضحك مروان :
- هو لازم يمر ؟!!
يوسف :- قصدك أيه ؟

نظر اليه مروان ثم أخرج كاميرا فيديو يدوية .. ثم أشار اليها :
- اتفضل .. ده سلاحك ..
يوسف فى غضب :
- أنت بتهرج يا مروان ..
مروان و ما زال فى ثقة كبيرة :
- أنت مستهين بالكاميرا الصغيرة دى .. هى فعلا متنفعش للتصوير .. بس فى نفس الوقت تنفع مسدس عيار 9 مللى ..

يوسف فى دهشة :- أيه !!!
أكمل مروان :
- أيوة .. أنا فرغت محتوياتها .. و احتفظت بالهيكل الخارجى .. و قدرت أركب
المسدس جواها .. و عملت شوية تعديلات مع نفس وزنها الطبيعى .. و بدل ما
تضغط على زناد المسدس .. ضغطة بسيطة على مفتاح التصوير .. تطلع رصاصة من
الكاميرا زى أى مسدس عادى .. و ممكن سرعتها أشد كمان ..

ينظر يوسف هائما الي الكاميرا الصغيرة :
- اه ..
مروان :- أنا كمان عملت لها ميزة .. أنا قدرت أضيف لها الآشعة تحت الحمراء اللى تقدر تظهر بها الأشخاص فى حالة الظلام ..

ضحك يوسف :- أنت عبقرى يا مروان .. لا ده أنت داهية ..
أكمل مروان :
- طبعا دى حفلة .. و فيها عرض .. و معاك الكاميرا و أنت داخل لتصويره .. و
عند البوابة الالكترونية تسلمها للأمن مع الموبايل .. و لما تعدى تاخدها
تانى .. زى ما الناس كلها بتعمل ..

ابتسم يوسف :
- فعلا .. انت صديق العمر ..
ضحك مروان : - فين بقية المبلغ ؟
يوسف :- هيوصلك .. أكيد هيوصلك و بزيادة ..



*********


أخذ يوسف تلك الكاميرا اليدوية .. و يعلم جيدا قيمتها ..و كم كانت سعادته
لايجاد ذلك الحل .. و عاد الى بيته .. و ما ان وجد حسام حتى نظر اليه فى
سعادة :
- خلاص المشاكل انتهت .. أنا قلت مفيش غيره المهندس مروان ..
بعدها أخبره ما فعله ذلك المهندس ..
حسام :- أنا أكتر حاجة تهمنى فى المهمة دى .. أنها أغلى مهمة جت لنا ..
يوسف :- و أنا زى ما قلت لك .. المهمة دى رد اعتبار ليا ..



*********


بدأ يوسف تدريباته لتلك المهمة باستخدام تلك الكاميرا الصغيرة .. و كيف
ينفذ جريمته فى غضون عشر ثوانى مظلمة .. و تزداد مقابلته لـ نور يوم بعد
يوم .. و بدأ يتجه الى شقتها كثيرا .. و يشعر بسعادة نور لتواجده معها ..

توالت الأيام .. ولم يتبق سوى أسبوعا واحدا على موعد تنفيذ جريمته ..
بعدها طلب من نور أن يقابلها .. و ما ان التقيا .. حتى قابلها بكل فرحة :

- نور .. أنا معايا دعوتين لحفل دار الاوبرا العالمى يوم الجمعة اللى جاى ..
نور فى ابتسامة :
- و انت هتروح مع مين !!
يوسف :- معاكى طبعا .. أنا بحب الأوبرا جدا .. و الحفلات دى لازم أحضرها .. و قلت لازم تحضرى معايا ..

صمتت نور قليلا .. ثم نظرت اليه فى حزن :
- يوسف .. أنا آسفة .. أنا مش هقدر آجى معاك ..

(الحلقة السادسة)

أخبرت نور يوسف أنها لن تستطيع الذهاب معه الى ذلك الحفل ..
فنظر اليها يوسف .. و قد شعر بالصدمة :

- ليه ؟!!
نور :- أنت بتقول ان الحفلة دى يوم الجمعة اللى جاى .. يعنى بعد أسبوع ..
و أنا مشغولة جدا يوم الخميس و الجمعة و كمان السبت .. و مش هقدر أجى ..
يوسف فى حسرة :
- ده أول طلب ليا !!
نور :- يوسف .. خليك مكانى .. يوم الخميس لازم أسافر بنى سويف .. لأن ده
ميعاد استلام كتب هتساعدنى فى الرسالة .. و الكتب دى مش موجودة الا فى
مكتبة هناك .. و أنا ما صدقت لقيتهم و حجزتهم .. و أكيد هكون مرهقة جدا
لما أرجع ..

يوسف و مازال يمتلك أملا فى ذهابها معه الى الحفلة :
- طيب ده الخميس .. و الحفلة الجمعة ..
نور :- استنى .. شوف بقى هكون مرهقة أد أيه .. و مع ذلك هسافر يوم الجمعة الاسكندرية ..
يوسف فى دهشة و غيظ :
- نعم !!! .. ليه ؟!
نور :- هناك حصلت جريمة قتل .. و الحمد لله هناك ظابط أعرفه .. هيخلينى
أعمل حوار مع القاتل .. و مع أهل المجنى عليه .. و ده هيساعدنى جدا فى
الرسالة ..
يوسف فى غيظ شديد :
- الرسالة تانى !! بس برضه .. تقدرى ترجعى القاهرة قبل الحفلة ..

صمتت نور قليلا :
- بصراحة بقى .. فيه حاجة كنت هقولك عليها .. بس قلت بلاش أحسن ..
يوسف :- حاجة أيه ؟!!
نور :- أنا هسافر من اسكندرية على البلد عند ماما .. لأنها اتصلت بيا .. و
قالت ان فيه عريس متقدم ليا .. وهيزورونا هناك يوم السبت ..
يوسف فى دهشة مرة أخرى :
- أيه .. عريس !!! .. و لازم يجى الأسبوع الجاى ؟!!
نور :- اه .. هو صحيح معيد فى الجامعة .. و فى نفس مجالى بس بيموت فى
البنات .. و آه لو بنت بصت له .. ينسى الدنيا عشانها .. و أنا مش موافقة
عليه .. و مش هوافق أبدا .. بس ماما أصرت أنى لازم أقابلهم طالما هيزورونا
..

بعدها أخرجت هاتفها الخلوى :
- شايف صورته عاملة ازاى .. أنا اتجوز واحد زى ده !!

نظر يوسف الى تلك الصورة .. بعدها أمسك بهاتفها .. و قام بارسال تلك الصورة الى هاتفه الشخصى .. فنظرت اليه نور فى دهشة :
- أنت أخدت الصورة ليه ؟!!
يوسف فى ابتسامة :
- عاوز احتفظ بصورة عريس نور ..
قامت نور بضربه بيدها برفق :
- قلت لك مش هوافق .. بعدين أنا مش شايفة أنك حسيت بالغيرة و لا حاجة ..
يوسف :- لا طبعا .. أنا زعلان جدا .. هو اسمه أيه ..
نور :- مين ؟!!
يوسف :- العريس ..
نور :- اسمه محمد ثروت .. ليه ؟!!
يوسف :- أصلى حبيته جدا ..
نور فى حزن :
- تعرف .. أنا كان نفسى أحضر معاك الحفلة .. بس أنت أكيد قدرت ظروفى ..
:- اه لو معايا مصباح علاء الدين .. و كل الحاجات دى تتعمل و أنا فى مكانى ..

ابتسم يوسف :
- من هنا ليوم الجمعة مين عارف أيه اللى هيحصل ..
بعدها واصلا حديثهما .. حتى ودعها .. و عاد الى البيت ..



*********


عاد يوسف الى بيته .. و يفكر هل انتهى كل ما خطط له بعدما رفضت نور أن
تذهب معه الى الحفل .. و لابد أن يجد حلا .. و بعد تفكير طويل .. قام
بالاتصال بـ نور .. وعرف منها عنوان تلك المكتبة بـ بنى سويف .. و اسماء
الكتب التى تريدها دون أن يخبرها ماذا سيفعل .. بعدها اتجه الى كل من حسام
و منال .. و نظر اليهما :

- فيه تعديلات جديدة دخلت الخطة ..
حسام :-خطة أيه ؟!!
يوسف :- المهمة الجاية ..
منال :- و أيه هى التعديلات ؟!
نظر يوسف الى حسام :
- حسام .. أنت هتسافر بنى سويف قبل يوم الخميس ..
حسام فى دهشة :
- أيه .. بنى سويف !!!
يوسف :- أيوة .. فيه هناك مكتبة مشهورة .. عنوانها فى الورقة دى .. و هناك
هتلاقى كتب محجوزة باسم نور .. هتدفع تمنها و تجيبها .. بس لازم قبل يوم
الخميس ..

حسام :- نور .. البنت !!!
يوسف :- أيوة ..
حسام فى غيظ :
- و أنا أسافر أجيب لها كتب ليه .. ؟؟ و كمان بنى سويف !!
يوسف فى حزم :
- كله فى سبيل المهمة ..

بعدها نظر الى منال :
- انتى عليكى الدور الاكبر فى التعديلات دى ..
منال :- أنا !!!

أخرج يوسف هاتفه الخلوى .. و أشار الى صورة الشاب الذى يريد الزواج بـ نور :
- دى صورة معيد فى كلية الآداب .. و عاوز يتقدم لجواز نور ..
منال فى حيرة :
- أنا مش فاهمة ..
يوسف :- من سوء حظنا .. أنه هيزور أهلها يوم السبت .. و نور كدة هتسافر بلد أمها يوم الجمعة ..
منال ولازالت فى حيرة :
- برضه مش فاهمة ..
أكمل يوسف حديثه :
- من حسن حظنا .. أنه بيموت فى البنات زى ما عرفت ..
أنا بقى عاوز العريس ده ينسى نور الأسبوع ده .. طبعا أنتى عارفة هتعملى أيه ..
منال :- اه .. بس ده مش وسيم خالص ..
يوسف :- استحملى .. قدامك كام يوم .. عاوز أسمع أنه خلاص مش هيتقدم لـ نور فى اليوم ده ..
حسام فى غضب :
- أيه اللى بيحصل ده .. أنا حاسس أننا بنشتغل عند نور دى ..

بعدها أعطى يوسف منال اسم ذلك الشاب .. و هو يثق فى قدرتها فيما ستفعله ..
لما تمتلكه من شدة جمال و أنوثة عالية تستطيع أن تجعل من أمامها يعيد
تفكيره كثيرا ..



*********


فى اليوم التالى .. بدأت منال خطتها .. و كيف تجعل هذا الشاب لا يذهب الى
زيارة أهل نور فى موعده .. و قد اتجهت الى محل عمله فى الجامعة .. و معها
صورته .. و ظلت تبحث و تسأل عنه حتى وجدته .. فدخلت عليه فى ابتسامة :

- أنت الدكتور .. محمد ثروت ؟!!
نظر اليها .. و قد اهتز من جمالها :
- اه .. أيوة أنا ..
منال فى رعونة :
- أنا كنت بقرأ كتاب فى علم النفس .. و مش فاهمة أى حاجة .. و عرفت أنك متمكن من علم النفس .. ممكن تشرحه ليا ..
نظر اليها فى فرحة :
- بس كدة !!
منال فى رعونة أكثر :
- أنت شكلك محترم أوى ..
أكملت :- الكتاب كبير أوى .. أنا بكون موجودة فى القاهرة أيام الاتنين ..
و التلات .. و السبت .. بس .. لأنى مش من القاهرة .. حضرتك فاضى فى
المواعيد دى ؟!!

فى فرحة وكأنه هائما :
- أنا .. أيوة .. أكيد فاضى .. حتى لو مشغول ..

ضحكت منال .. و واصلا حديثهما .. و استطاعت منال أن تستغل أنوثتها .. و تسيطر على عقله ..



*********


أما حسام فقد استقل القطار .. و اتجه الى بنى سويف .. و بعدما وصل هناك ظل
يبحث عن تلك المكتبة .. ليحضر الكتب التى تريدها نور .. و قد بحث كثيرا ..
و أصابه الارهاق .. و شعر بالضيق .. و كأنه قد حدث له ما لم يحدث فى حياته
.. حتى وجد تلك المكتبة .. و وجد صاحبها .. فنظر اليه .. و كأنه لايطيق
نفسه :

- فيه كتب هنا علم نفس .. محجوزة باسم نور ..
صلحب المكتبة :- هى اسمها نور أيه ؟
حسام :- أنا مش عارف .. بس هى من القاهرة .. و الكتب عن علم النفس ..
صمت الرجل قليلا :
- اه .. افتكرتها ..
ثم عاد ليكمل :
- بس دى ميعاد استلامها يوم الخميس .. يعنى لسة يومين ..
حسام :- أنا خطيبها .. و عاوز أعمل لها مفاجأة .. ثم أخرج نقود من معه و أعطاها للرجل ..

أخذ الرجل النقود .. ثم نظر اليه :
- ثوانى .. هجيب لك الكتب حالا ..

انتظر حسام قليلا .. حتى شعر بالصدمة حين وجد كم الكتب الهائل الذى يحضره الرجل .. فنظر اليه فى حسرة :
- أيه ده .. كل ده !!!
الرجل :- أيوة ..
حسام فى غيظ قى صوت خافت :
- أنا بكره نور .. و بكره يوسف .. و بكره نفسى ..



*********


عاد حسام الى القاهرة .. وما ان وصل ذلك البيت الذى يجتمع فيه مع يوسف و
منال .. حتى وجد منال تصل هى الأخرى .. و قد وجدا يوسف فى انتظارهما ..

حسام فى غيظ :- أنا عملت كل المطلوب منى .. جبت الكتب .. و بعتهم لعنوان شقة نور .. و أكيد وصلتها ..
يوسف فى سعادة :
- جميل جدا ..
منال :- ده العريس ده طلعت عينه زايغة أوى .. ده بمجرد أنه شافنى مكنش
مصدق نفسه .. و كم كلمة منى حسسته أنى حبيته من أول نظرة .. و اطمن أنا
اتفقت معاه أنى هقابله يوم السبت و هو وافق ..
يوسف فى سعادة أكبر :
- رائع ..

و لم يكمل حديثه .. حتى وجد هاتفه الخلوى يشير الى اتصال نور .. فقام بالرد

نور فى فرحة :
- يوسف .. أنا لقيت مصباح علاء الدين ..
يوسف فى مكر :
أيه ..
نور :- أيوة .. مشاكل نهاية الأسبوع اتحلت ..
يوسف و كأنه مندهش :
- ازاى !!
نور :- الكتب و صلت لباب الشقة .. و ماما اتصلت قالت ان العريس عنده ظروف .. و مش هيقدر يجى يوم السبت ..
يوسف :- مش معقول .. يعنى تقدرى تيجى الحفلة ؟!!
نور فى حزن :
- للأسف .. زى ما قلت لك .. لسة مشكلة واحدة .. أنا هروح اسكندرية يوم
الحفلة عشان أعمل تقرير يفيد الرسالة .. و رغم أنى هخلص بدرى قبل ميعاد
الحفلة .. بس المشكلة ان ميعاد قطر القاهرة من هناك هيكون متأخر ..

صمت يوسف فترة ليست بالقليل :
- نور .. أنا هاجى معاكى اسكندرية بالعربية بتاعتى .. و بعد ما تخلصى نرجع .. و نروح الحفلة سوا ..
نور فى سعادة :
- مكنتش أعرف أنك بتحبنى كدة ..
يوسف :- أيه !!
نور :- لا .. مفيش حاجة ..



*********


بعدما انتهت المكالمة .. نظر الى كل من حسام و منال :
- أنا هروح اسكندرية مع نور يوم الجمعة .. هناك جريمة قتل و عاوزة تعمل
تقرير عنها فى رسالتها .. و هحاول أوصل بدرى على قد ما أقدر ..
منال فى غضب :
- أنا من رأيى .. نختار أى بنت من الشارع أحسن ..
حسام فى سخرية :
- لا .. أنا من رأيى نلغى المهمة دى .. لو كل مهمة كدة يبقى نرتاح .. و نقعد فى بيوتنا أحسن ..
نظر اليهما يوسف فى حزم :
- أنا واثق فيها ..
:- أنا عاوز كل حاجة تكون جاهزة بمجرد ما نرجع من اسكندرية .. بدلة الحفلة .. و الكاميرا ..



*********


فى صباح يوم الجمعة - صباح يوم الحفلة - .. استقل يوسف سيارته و قد اتجه
الى نور .. ليسافرا معا الى الاسكندرية .. و ما ان رأته .. حتى اتجهت الى
سيارته .. و جلست بجواره .. بعدها بدءا طريقهما الى الاسكندرية ..

نور فى سعادة :
- أنت وقعت ليا من السما .. أنا عمرى ما بحب السفر فى القطر ..
ابتسم يوسف ابتسامة مصطنعة :
- أنا مقدرش أسيبك تسافرى لوحدك ..
نور :- ياه .. ده أنت بتخاف عليا بقى ..
يوسف :- طبعا ..
نور :- بجد أنا مبسوطة أوى ... ثم سكتت ..
بعدها نظرت اليه :
- و لّا كل ده عشان أحضر معاك الحفلة ..
يوسف فى مكر :
- ما هى الحفلة كمان هكون معاكى ..
نور :- اه .. صح ..
تحدث يوسف الى نفسه :
- دى عبيطة ..



.........


بدأ الوقت يمر .. و يواصلان حديثهما .. حتى اقتربت السيارة من الأسكندرية ..

نور :- أنا فى الأول هروح قسم الشرطة .. هناك هعمل مقابلة مع القاتل .. و
هسجل بعض النقط .. و بعدين نروح بيت أهل المجنى عليه .. و أعمل مقابلة
تانية .. طبعا أنت هتيجى معايا ..
يوسف :- لا .. أنا مش هدخل القسم .. أنا هستناكى فى العربية لحد ما تخلصى ..
نور :- ليه ؟!
يوسف :- كدة .. مبحبش أدخل أقسام .. بتشاءم .. بس ممكن آجى معاكى عند أهل المجنى عليه ..
نور :- خلاص و أنا مش هتأخر .. هحاول أخلص بدرى على قد ما أقدر ..



*********


وصلت السيارة الى قسم الشرطة .. و قد غادرتها نور .. و ظل يوسف فى السيارة
ينتظرها .. و كعادتها مر وقتا طويلا حتى عادت نور مرة أخرى الى السيارة ..
فنظر اليها يوسف فى غضب :
- أنتى اتأخرتى جدا ..
نور و كأنها لا تبالى :
- دول ساعة و نص بس .. على اما قدرت أجمع النقط اللى محتاجاها ..

بعدها ركبا السيارة .. و اتجها الى بيت المجنى عليه فى ذلك الحادث .. و قد
ذهب معها يوسف الى ذلك البيت .. و ما ان دخلا حتى التقت نور بـ أرملته ..
و بدأت تسألها بعض الأسئلة عن زوجها الذى قتل .. أما يوسف فلم يرفع عينه
عن تلك الطفلة الذى لا تكف عن البكاء لمقتل أبيها .. و قد اقتربت من أمها
.. و لا تزال تبكى و احتضنتها ..

و يوسف لا يحرك ساكنا .. و ينظر اليها .. حتى لاحظت نور ذلك حين اقترب من
الطفلة .. و بدأ يداعبها ويحرك يده على شعرها الأملس .. و كأنه تحرك شئ
بداخله ..

حتى انتهت نور من عملها .. و قد غادرا سويا و صورة بكاء الطفلة لا تفارق يوسف ..



**********


عاد يوسف و نور مرة أخرى الى القاهرة .. و قد طلب منها أن تعد نفسها للحفل
.. و أنه سوف ينتظرها بمكان ما أمام دار الأوبرا .. أما هو فقد عاد الى
بيته .. و أعد نفسه .. و ارتدى بذلة أنيقة .. و أخد تلك الكاميرا معه ..


.........


اتجه يوسف الى الحفل .. و وجد نور قد وصلت .. و قد ارتدت ثوبا أنيقا زاد من جمالها .. فابتسم :
- أنتى جميلة أوى النهاردة ..
نور فى دعابة :
- طبعا ما أنا عارفة .. ثم نظرت الى الكاميرا :
- أيه ده .. يلا صورنى ..
يوسف :- للأسف .. أنا اشترتها و فوجئت بها فى الطريق أنها مش شغالة .. هحاول فيها و احنا فى الحفلة .. ممكن تشتغل ..
نور :- طيب خليها معايا ..
يوسف :- لا ... ثم نظر اليها :
- مش عاوز اتعبك ..

بعدها أمسك بيدها ليدخلا الحفل .. و قد زادت دقات قلبه .. و لمع بريق عينه
عند بوابة الدخول الالكترونية .. لكنه لم يحدث شئ .. و مر كل شئ بصورة
طبيعية كما توقع المهندس مروان .. و قد ابتسم يوسف لذلك .. و دخلا الحفل و
جلسا ..

نور :- تصدق أنى أول مرة ادخل الأوبرا ..
يوسف :- أنا دخلتها كتير .. أنا بحب الحفلات جدا ..

بعدها شاهد هدفه يصل الى الحفل .. ثم بدأ العرض .. و قام يوسف بضبط ساعته ..

نور :- يوسف .. أنا مش فاهمة أى حاجة من العرض ده ..
يوسف و لا يزال يرقب هدفه :
- ده عرض أوبرالى عالمى .. هتفهميه مع مرور الوقت ..
ضحكت نور :
- حتى لو مفهمتش .. كفاية أنى معاك ..
يوسف :- أيه ..
نور :- يوسف .. حد قالك قبل كدة أنه بيحبك ..
يوسف :- أنا .. لا ..
نور :- و لا عمرك حسيت أن حد بيحبك ..
يوسف :- قصدك حب من بنت يعنى ؟
نور :- أيوة ..
يوسف :- لا ..
نور :- تعرف .. أنا مشكلتى أنى جريئة جدا .. بس معاك كنت مترددة أقولك ..
و لما عملت كل ده عشان نحضر الحفلة مع بعض .. لازم أقولك أنى ....
قاطعها يوسف :
- عملت أيه ؟!!
نور فى ابتسامة :
- يعنى الكتب اللى وصلت لباب الشقة .. و العريس اللى طار .. و سفر الاسكندرية .. عرفت أنك بدأت تحبنى ..

ابتسم يوسف لكنه لم يتحدث .. ثم بدأ الوقت يمر .. و يوسف يتابع هدفه بدقة
.. و ينظر الى ساعته .. و الجميع مهتم بذلك العرض .. حتى اقترب وقت
التنفيذ .. و أخرج يوسف تلك الكاميرا .. حتى ساد الظلام قاعة الحفل ..

(الحلقة السابعة)

ساد الظلام قاعة الحفل .. و أخرج يوسف تلك الكاميرا التى تعد بمثابة مسدسا كاتم للصوت .. و ما ان وجهها نحو هدفه .. و كاد أن يطلق الرصاص حتى تذكر تلك الطفلة التى رآها فى الاسكندرية مع نور .. و دموعها حين قتل والدها .. فاهتزت يداه و ابتعدت عن الهدف .. بعدها حاول تمالك نفسه و صوب تلك الكاميرا مرة ثانية .. لكن صورة الطفلة لم تفارقه .. فلم تستطع يده أن تطلق الرصاص .. حتى أعيد الضوء مرة أخرى و لم يقتل ذلك الهدف .. بعدها نظرت اليه نور فى دهشة :

- يوسف .. أنت عينيك بتدمع ..
يوسف :- أيه !!!
نور :- هى الحفلة اللى أنا مش فاهمة منها حاجة .. مؤثرة للدرجة دى ..
ابتسم يوسف :- تقريبا مؤثرة ..

بعدها أخرجت نور منديلا ورقيا .. و قد مسحت به تلك الدموع التى تواجدت على وجه يوسف .. فنظر اليها فى ابتسامة :

- يلا .. نخرج ..
نور :- و الحفلة !!
يوسف فى ابتسامة :
- أنا بصراحة مش فاهم أى حاجة أنا كمان ..

ضحكت نور .. و خرجا معا من ذلك الحفل .. و ظلا يسيران
و نور تضحك و تتحدث :
- و تقول لى أنك أوبرالى .. و بتموت فى الحفلات .. ثم أكملت :
- بس أنا أول مرة أشوف دموعك ..
يوسف :- تصدقى أنها كانت دموع فرح ..
نور فى دهشة :
- دموع فرح !!!
هز يوسف رأسه :
- بكرة تفهمى كل حاجة ..

بعدها صمت يوسف .. و يتذكر نفسه حين فعل كل شئ حتى ينفذ تلك الجريمة .. و ما ان تذكر تلك الطفلة حتى تحول الى شخص آخر .. لا يهمه تلك النقود التى دائما ما كان يسعى اليها .. أو سيرته الاجرامية التى طالما أراد أن تكون الأفضل .. حتى قاطعت نور تفكيره :

- يوسف .. أنت سرحت و لا أيه ..
نظر اليها :- نور .. أنا آسف ..
نور :- آسف على أيه ؟!
يوسف :- مش مهم تعرفى دلوقتى ليه أنا آسف .. بس لو عرفتى فى يوم أرجوكى تسامحينى ..
نور فى حيرة :
- أنا مش فاهمة حاجة ..

بعدها أكمل يوسف حديثه :
- تعرفى أنك أجمل حاجة حصلت لى فى حياتى ..
نور فى سعادة :
- يوسف .. بجد !!
يوسف :- و الله العظيم بجد .. و المرة دى فعلا بقولها بجد .. أنا دلوقتى أسعد واحد فى الدنيا .. فاكرة لما قلتى لى أنى أنقذتك مرتين من غير ما أعرفك ..
نور :- أيوة ..
يوسف :- لو غرقتى ألف مرة .. أنا كنت هنقذك الألف مرة ..
نور فى ابتسامة :
- عارفة أنك انسان .. و انسان كبير أوى ..
يوسف :- أنا لما سافرت معاكى اسكندرية النهاردة .. كنت مسافر شخص .. و رجعت شخص تانى خالص ..
نور :- للأحسن و لاّ ؟
يوسف :- للأحسن .. ثم صمت .. بعدها ضحك :

- تعرفى نفسى أخدك .. و نطلع القمر ..
نور :- أيه الرومانسية دى كلها .. مش ملاحظ أنك اتكلمت كتير النهاردة ..
يوسف :- فاكرة لما قلتى أنى أول واحد يهتم بيكى .. أنا بقى عمر ما حد اهتم بيا .. حتى كل اللى أعرفهم .. بالنسبة لهم حاجة بتجيب فلوس و خلاص .. و أول ما الفلوس تروح هيكونوا أول ناس يسيبونى ..
نور فى دهشة :
- ياه .. هى الحفلة غيرتك كدة !!
يوسف :- نور .. أنا بجد عاوزك تفضلى معايا .. نفسى أكون يوسف .. مش حد تانى ..
بعدها واصلا حديثهما .. و قد أوصلها الى بيتها ..



*********


عاد يوسف يسير بمفرده .. و يشعر بسعادة بالغة و ارتياح لم يشعر بهما من قبل .. حتى وجد رجلا عجوزا يجلس على ضفة النيل .. و يصطاد فى ذلك الوقت المتأخر .. فجلس بجواره يتأمل منظر النيل .. و يتذكر نفسه فى كل جريمة قتل اقترفها .. و تساقطت دموعه .. حتى نظر اليه العجوز :

- ياه .. أنت همومك كبيرة للدرجة دى ؟!!

سكت يوسف .. و لم يتحدث فصمت العجوز .. و واصل الصيد .. و بعد لحظات نظر اليه يوسف .. و قد مسح دموعه :

- تعرف يا حاج .. أنا لى واحد صاحبى .. كانت مشكلته أنه شايف الدنيا من جهة واحدة بس ..
:- صاحبى ده عمل كل حاجة غلط فى حياته .. سرق و قتل و كل حاجة تتصورها ..
:-كان يقتل .. و يفرح أن رصيده بيزيد .. و عمره ما فكر مين اللى بيقتله .. و لا هو أيه بالنسبة لأهله .. و لا مصير أولاده أيه ..
:- كان يقتل وعارف مصير نفسه .. اما هيموت مقتول زى اللى قتلهم .. أو يتحكم عليه بالاعدام ..

و العجوز يواصل صيده .. و أذنه تستمع الى يوسف الذى يواصل حديثه :

- فى لحظة ربنا بعت له ملاك .. بدل ما يحافظ على الملاك ده .. حاول يستغله أنه يقتل تانى ..
فى سخرية من نفسه :
- شفت صاحبى ده حقير أد أيه ..
أكمل :
- النهاردة كان كل همه أنه يقتل انسان .. بس القدر بعت له طفلة فكرته بنفسه لما أبوه مات مقتول .. و افتكر دموعه .. و حس بالطفلة لأنه عارف الشعور ده .. بس نسى كم مرة كان سبب فيه لناس كتير ..
و فى اللحظة اللى كان هيقتل فيها الانسان ده .. لأول مرة يفكر فى حياته أنه يبص على الجهة التانية من الدنيا .. و سأل نفسه يا ترى أولاد الضحية دى هتسامحك و لا لأ ..

نظر اليه العجوز .. و قد أخرج سمكة كبيرة اصطادها :

- أنت شايف السمكة دى كبيرة أد أيه .. أكيد أكلت سمك كتير غيرها .. بس فى النهاية شبكت فى الصنارة .. حتى لو فضلت فى الميا هتيجى سمكة أكبر منها و تاكلها ..

:- صاحبك ده لو فضل فى طريقه .. هيبقى عامل زى السمكة .. و كويس أنه عارف مصيره .. زى ما أنت قلت يا القتل يا الاعدام .. بس فيه حاجة كمان نساها ..

يوسف :- أيه هى ؟!!
ابتسم العجوز :
- ان ربنا غفور رحيم ..
بعدها سمع العجوز آذان الفجر .. فنظر الى يوسف :
- قوم بينا نصلى ..
يوسف :- أيه !!
العجوز :- نصلى .. سيب صاحبك هنا .. و تعالى أنت صلّى ..

ابتسم يوسف .. و قد ألقى بتلك الكاميرا التى كانت معه فى المياه .. و قد اتجه الى الصلاة مع ذلك العجوز .. و ما ان انتهى من الصلاة .. حتى شكر ذلك العجوز .. فنظر اليه العجوز فى ابتسامة :
- أنا رجعت السمكة الكبيرة للميا تانى .. أكيد مش هتاكل سمك صغير بعد كدة ..
يوسف فى ابتسامة :
- أكيد ..



*********


ضحك يوسف .. و قد فهم ما يقصده ذلك العجوز الحكيم .. و قد عزم على أن يعود الى بيته .. لا ليمكث به .. و انما ليأخذ مقتنياته .. و يرحل عنه .. حتى وجد كل من حسام ومنال فى انتظاره ..

حسام فى غضب :
- أيه اللى حصل ؟ .. أنا عرفت أنه خرج سليم ..
يوسف :- أيوة ..
حسام :- ازاى .. و التعب اللى تعبناه .. و الفلوس ..
يوسف :- ده اللى همك .. الفلوس .. نصيبك أنا هعطيه لك .. و أنا مش هقتل تانى ..

حسام فى دهشة :
- أيه الكلام ده .. يعنى أيه مش هتقتل تانى ؟
يوسف فى سخرية :
- هى معناها صعب للدرجة دى ؟
منال:- كاسانو .. أنت أكيد تعبان ..
يوسف :- آه نسيت .. فيه انسان لازم اقتله .. و أكيد هقتله ..
منال :- مين ده ؟
يوسف :- كاسانو ..
بعدها نظر الى منال:
- أنا اسمى يوسف .. أنا هسيب لكم البيت ده من حقكم .. اتصرفو فيه .. أنا هبعد .. هسكن فى أى مكان يكون لـ يوسف و بس ..
منال :- يوسف .. أنت نسيت أنى بحبك ..
يوسف :- أنتى بتحبى كاسانو .. كاسانو مخزن الفلوس .. صدقينى يوسف مش هينفعك ..
منال :- نور السبب فى اللى أنت فيه ده ؟

لم يرد يوسف .. و لم يستمع الى حديثهما .. بعدها حزم أمتعته و قد رحل ..



*********


شعر كل من حسام و نال بالغيظ .. والغضب الشديد ..

منال :- أكيد البنت دى هى السبب .. من أول ما دخلت حياته .. و حياته اتغيرت ..
حسام :- آه .. أنا كنت حاسس .. واللى خفت منه حصل ..
منال :- أنا استحالة أسيبه يضيع منى ..
حسام فى سخرية :
- يضيع !! ما خلاص ضاع ..
منال :- لا .. البنت دى لازم تخرج من حياته مهما كان التمن ..



*********


مرت الأيام .. و بدأ يوسف حياة جديدة .. و قد حصل على مسكن جديد .. و بدأت علاقته بـ نور تزداد .. و أصبحت السعادة شعار حياته .. و يشعر بسعادة نور كلما كانت معه .. حتى نظرت اليه ذات مرة :

- يوسف .. هو أيه اللى حصل لك ..
يوسف :- أنا سعيد أوى أنى معاكى ..
منال فى دعابة :
- ده احنا اتغيرنا أوى ..
يوسف فى ابتسامة :
- اتغيرت للأحسن ..
نور :- تصدق .. أنى لحد دلوقتى مش عارفة أكمل الرسالة .. أنا شكلى هفشل فيها ..
صمت يوسف :
- لا .. أكيد هتكون أحسن رسالة ..
نور :- أنا عاوزة أعرف كتير عنك .. أنت كل ما تكلمنى عن ماضيك تسكت ..
يوسف :- الماضى ده مرحلة و انتهت .. خلينا فى الحاضر ..
نور :- عندك حق .. بس أنت مفكرتش ترجع بطل رماية من تانى ..
يوسف :- لا .. بس أنا ناوى اشتغل ..
نور :- تشتغل ؟!
يوسف :- أيوة واحد أعرفه من زمان .. قدر يلاقى لى شغل فى شركة حراسات خاصة فى ايطاليا ..
نور وقد ظهر الحزن على وجهها :
- ايطاليا !!!
يوسف :- أنا لسة بفكر .. بس تقريبا كدة هرفض .. أنا خلاص قررت أنى مش هسيبك تانى ..



*********


مرت الأيام .. و تعلق يوسف بـ نور أكثر و أكثر .. و زادت غيرة منال .. التى كانت تتابع أخباره .. حتى وصلت غيرتها الى أقصى حدودها .. و قد ذهبت الى نور فى شقتها .. و ما ان رأتها نور .. حتى اندهشت :

- أنتى مين ؟!!
منال :- أنا .. تقدرى تقولى كدة واحدة خايفة عليكى ..
نور فى دهشة :
- خايفة عليا !! .. من أيه ..
منال :- من كاسانو ..

(الحلقة الثامنة)

ذهبت منال التى ازدادت غيرتها حتى وصلت ذروتها الى نور .. و ما ان رأتها نور حتى اندهشت :

- أنتى مين ؟!
منال :- أنا .. تقدرى تقولى كدة .. واحدة خايفة عليكى ..
نور و مازالت الدهشة تبدو عليها :
- خايفة عليا !! .. من أيه ؟
منال :- من كاسانو ..
نور :- أيه .. كاسانو .. يعنى أيه ؟!!
منال :- كاسانو .. يوسف ..
نور مرة أخرى فى غضب :
- أنتى مين ؟
منال :- أنا كنت حبيبته .. و لازم تبعدى عنه ..
نور تتمالك نفسها :
- بس أنتى قلتى .. كنت .. يعنى ماضى ..
منال :- اه .. بس هنرجع لبعض .. أصل احنا مناسبين لبعض جدا ..
أكملت :- أوعى تكونى فكرتى ان يوسف بيحبك ..
نور :- يوسف فعلا بيحبنى ..
ضحكت منال ضحكة ساخرة :
- يوسف عمره ما حبك .. أنتى بالنسبة له بنت عبيطة .. حاول يستغلها فى جريمة ..
نور فى صدمة :
- جريمة !!!
منال :- أيوة جريمة .. و أنا لأنى خايفة عليكى .. حبيت أنقذك منه .. يوسف كان هدفه كله أنك تدخلى معاه الحفلة ..
نور تتذكر :
- الحفلة ..
منال :- أيوة .. كانت عنده مهمة قتل هناك .. و كان محتاج بنت تدخل معاه ..
نور هائمة :- قتل ؟!!
منال :- أيوة قتل .. زى الجرايم اللى عملها كتير قبل كدة .. و اللى بسببها كان فى شرم الشيخ .. و قابلك هناك ..
:- أنا اللى أثرت على العريس اللى كان هيتقدم لك .. الدكتور محمد ثروت .. و عشانى غير الميعاد .. غير الكتب اللى وصلت لبيتك ..
:- أكيد طبعا بعد الكلام ده .. بنت زيك مش هترضى لنفسها أنها تكون مع واحد .. القتل أسهل حاجة عنده ..



........


صمتت نور .. و بعدها غادرت منال .. و قد شاهدها يوسف و هى تخرج من بيت نور دون أن تراه .. فأصابته الصاعقة .. و ظل يحدث نفسه :

- منال !!!
:- أيه اللى جابها هنا !!

بعدها خاف أن تكون منال قد سببت أذى لـ نور .. فأسرع الى شقتها يطمئن عليها .. و ما ان وجدها حتى سألها فى لهفة :

- نور .. أنتى كويسة ؟
صمتت نور .. و لم تجب ..
يوسف مرة أخرى :
- نور .. أنتى كويسة ..
نظرت اليه نور .. و قد ملأت الدموع عينيها :
- كاسانو ..
شعر يوسف بالصدمة حين سمعها .. و لم ينطق ..
نور و قد تساقطت دموعها :
- كاسانو .. قاتل !!
يوسف :- نور ..
نور :
- مش قلت لك دايما حظى كدة .. حتى اللى أحبه يطلع بيستغل سذاجتى عشان ينفذ جريمة ..
يوسف :- نور .. أرجوكى ..
صاحت نور :
- حرام عليك .. أنت ليه خلتنى أحبك .. ياريتك سبتنى أغرق ..
يوسف :
- نور .. أنا دلوقتى يوسف .. يوسف و بس .. كاسانو ده انتهى ..
نور فى سخرية :
- انتهى !!! بأمارة الحفلة .. و أنا اللى فكرت ان معايا مصباح علاء الدين .. بس الواضح أنك كنت أقوى منه ..
:- تفرق أيه عن اللى قتل بابا .. و مين عارف .. ممكن تكون أنت اللى قتلته ..

يوسف :- لا .. أرجوكى بلاش تظلمينى .. نور صدقينى .. أنا بدأت اتغير ..
نظرت اليه نور :
- يوسف .. أو كاسانو .. أنت عاوز منى أيه ؟
يوسف :- نور .. أنا بحبك فعلا .. و الله بحبك ..
:- نور .. ده أكتر وقت محتاج لك فيه .. أرجوكى خلينى أهزم كاسانو ..
نور وقد تمالكت نفسها :
- أرجوك أنت .. أخرج ..
يوسف :- نور .. لو بعدت أخاف يقتلنى كاسانو ..
نور مرة أخرى :
- أرجوك .. أخرج ..



.........


بعدها واصلت بكاءها .. و قد غادر يوسف شقة نور .. و عاد الى مسكنه .. و يحدث نفسه :

- أكيد عندها حق .. أنت نسيت أنك قاتل ..
و يعود مرة أخرى :
- بس أنا بدأت اتغير .. و مش هقتل تانى ..
ثم يسأل نفسه :
- و ماضيك .. مين اللى هيغيره ..
:- عشت طول عمرك انسان رخيص .. أنانى .. بس تقريبا هو ده قدرك ..
:- حتى لما انسان حبك .. ضيعته من أيدك لأنك عمرك ما فكرت صح أبدا فى حياتك ..



*********


ظل يوسف يفكر كثيرا .. و كادت رأسه تنفجر من كثرة الأفكار التى تدور برأسه .. حتى خرج مرة أخرى من بيته .. و ظل يسير حتى اتجه الى ذلك المكان الذى كان يصطاد به العجوز .. فوجده هناك فنظر اليه :

- خايف السمكة ترجع تاكل غيرها تانى .. لأن غيرها مش قادرين يصدقوا أنها اتغيرت .. و مش قادرين يسامحوها .. ثم تساقطت بعض دموعه ..

:- نفسى فى فرصة أثبت بيها أنى اتغيرت .. نفسى الناس تحبنى و لو للحظة واحدة .. بس ازاى يحبونى .. و أنا كنت دايما سبب فى حزنهم .. يظهر أن ضميرى صحى متأخر .. و متأخر أوى ..

و العجوز يصطاد .. و يتركه يتحدث .. و يخرج ما عنده ..
أكمل يوسف :
- حتى الانسانة اللى حبتها .. و قلت معاها هبدأ حياتى سابتنى أول ما عرفت حقيقتى ..
ابتسم العجوز :
- أنت حبتها فعلا ؟..
يوسف :- كنت دايما أقول قلبى ده صخرة .. بس أنا من أول لحظة شفتها حبتها .. و كنت بحاول أضحك على نفسى .. و أقول ان عمرى ما بطيقها .. بس قد أيه بتكون سعادتى لما بشوفها ..

العجوز :- و هى حبتك ؟
يوسف :- أنا متأكد .. أنها كانت بتحبنى ..
العجوز :- و دلوقتى ؟
صمت يوسف قليلا :
- مش عارف ..

العجوز :- أكيد هى بتحبك .. و لو بتحبك هتسامحك حتى لو بعدت عنك .. أوعى تخلى السمكة تأكل غيرها تانى ..



*********


على الجانب الأخر .. زادت فرحة كل من حسام و منال لابتعاد نور عن يوسف .. و كأنهما واثقين من عودته اليهما مهزوما .. و قد نظر حسام الى منال :

- أنتى مش خايفة .. أنها تبلغ الشرطة عن كاسانو .. و نضيع كلنا ..
منال :- لا .. دى بنت عبيطة .. و بعدين تبلغ عن أيه .. كاسانو عمره ما ترك أثر وراه فى جريمة عملها ..
حسام :- بس أنتى قلبك شرير أوى .. أنتى بتحبى كاسانو للدرجة دى ..
منال :- أنا ممكن أقتل نور دى عشانه ..
حسام :- بس كاسانو هيرجع ؟
منال :- أكيد هيرجع ..



*********


مرت الأيام .. و يوسف كما هو يعيش بمفرده .. و كلما حاول الاتصال بـ نور .. لا تجيب .. لكنه عزم على مواصلة حياته الجديدة كما أراد أن يعيشها .. و بدأ يعود لممارسة رياضة الرماية مرة أخرى .. و أعجب كل من شاهده بمهارته الفائقة ..



.........


حتى جاء اليوم .. و قد سمع يوسف يدا تطرق باب شقته .. و عندما قام بفتحه .. وجد نور أمامه .. و دموعها فى عينيها ..

نور :- أنا مش قادرة أعيش بعيد عنك .. ثم احتضنته ..
:- يوسف .. أنا عارفة أنك اتغيرت فعلا ..
يوسف :- نور .. أنا محتاجك أوى ..
نور :- أنت الوحيد اللى خليت لـ حياتى معنى .. و لما بعدت عنى لقيتنى مش قادرة أعيش ..
:- أوعدنى ان كاسانو ده انتهى ..
يوسف وقد مسح دموعها بيده :
- لا .. لسة له دور مهم ..
نور وقد بدأت الدهشة تظهر عليها :
- دور !!!
يوسف :- أنا فكرت .. و قررت أنه يساعدك فى الرسالة ..
:- نور .. أنا من بكرة .. هقولك على كل الجرايم اللى ارتكبها كاسانو .. و شعوره وقتها .. و أنتى تحللى سلوكه ..و تسجليها عندك فى الرسالة بأسماء مجهولة .. و أكيد هتكون أفضل رسالة ..

ابتسمت نور .. و واصلا حديثهما .. بعدها غادرت نور شقته .. لكنها لم تعود الى بيتها ..



*********


اتجهت نور الى مكان آخر مختلف .. تسير قدماها ثابته .. حتى وقفت أمام حجرة يقف بجوار بابها شخص .. و كأنه شرطى .. و ما ان رآها حتى قام بفتح ذلك الباب لها .. و قد دخلت .. و كان فى انتظارها شخصين .. فنظرت اليهما فى سعادة :

- الفار دخل المصيدة ..
:- الخطة زى ما هى بالظبط .. بس بدل ما هنقبض عليه فى جريمة جديدة .. من بكرة هيقدم لى اعترافات بكل الجرايم اللى ارتكبها .. اللى أنا محتاجاه دلوقتى اذن النيابة بتسجيل الاعترافات دى ..