**كاسانو**قصه مسلسله

(الحلقة التاسعة)

اتجهت نور الى مكان آخر مختلف .. تسير قدماها ثابته .. حتى وقفت أمام حجرة يقف بجوار بابها شخص .. و كأنه شرطى .. و ما ان رآها حتى قام بفتح ذلك الباب لها .. و قد دخلت .. و كان فى انتظارها شخصين .. فنظرت اليهما فى سعادة :

- الفار دخل المصيدة ..
:- الخطة زى ما هى بالظبط .. بس بدل ما هنقبض عليه فى جريمة جديدة .. من بكرة هيقدم لى اعترافات بكل الجرايم اللى ارتكبها .. اللى أنا محتاجاه دلوقتى اذن النيابة بتسجيل الاعترافات دى ..

أحد الشخصين فى سعادة بالغة :
- هى دى نور اللى أنا أعرفها ..
ثم نظر الى نور .. و أشار الى من معه :
- المقدم أحمد سرور .. هو المسئول الجديد عن قضية كاسانو .. و هيتولى معاكى القضية .. و ان شاء الله تسلموا المجرم ده فى أسرع وقت للعدالة ..
ثم أشار الى نور :
- نور دى بقى أشطر عميلة سرية للشرطة .. كانت نظرتى فى محلها لما خطفتها بعد ما خلصت دراستها .. و اشتغلت معانا .. و بمساعدتها قدرنا نقبض على مجرمين كتير .. و قدمناهم للعدالة ..

ابتسمت نور :
- ده بعد توجيهات حضرتك يا فندم ..
المقدم أحمد سرور :- أنتى واثقة أنه هيقدم ليكى اعترافات ..
نور :- أكيد .. الاعترافات دى دليلنا الوحيد للقبض عليه .. و خصوصا ان مفيش أى أثر وراه فى أى جريمة .. و لولا اعتراف شخص شعر بالذنب .. بعد ما بعت له ايميل عشان يقتل خصمه .. كان زمانه حر دلوقتى .. و لا الشرطة تعرف عنه أى حاجة .. و من غير الاعترافات دى أى محامى صغير يقدر يخرجه من القضية بكل سهولة ..
ابتسم المقدم :
- بالتوفيق .. اذن النيابة بالتسجيل هيكون معاكى حالا ..



*********


حصلت نور على اذن النيابة بتسجيل اعترافات يوسف .. و قد غادرت و عادت الى شقتها .. لتجد صديقة عمرها سمر فى انتظارها .. و لم تكن سمر بمثابة صديقة فقط لها .. بل كانت كاتمة أسرارها .. و تعرف كل شئ عنها .. و كانت ثقة نور بها بلا حدود ..

سمر :- أيه أخبار المهمة الجديدة ؟
نور :- تقدرى تقولى الخطة ماشية بامتياز .. و أحسن من امتياز كمان لحد اللحظة دى .. كلها أيام و تنتهى المهمة ..
سمر :- هو قاتل برضه؟ ..
نور :- اه .. كان قاتل ..
سمر فى دهشة :
- كان !!!
نور :- بيقول أنه تاب .. بس أنا مش مصدقة .. ده حاول يستغلنى فى جريمة قتل ..
سمر :- بجد !! .. و افرضى كان قتل فعلا ..
نور :- لا .. اللى كان هيقتله كان معانا .. و كان متأمن تأمين كويس ..
سمر :- و المهمة دى زى غيرها .. و لا فيها جديد ؟ ..
نور :- لأول مرة ادخل مهمة باسمى الحقيقى من غير ما أغيره .. حتى دراستى علم النفس استخدمتها فى خطتى .. و السبب أنه حريص جدا .. و أى غلطة هتضيع مننا فرصة القبض عليه ..

ثم صمتت نور قليلا وعادت لتتحدث :
- بس هو شخص غريب جدا .. أوقات أحس أنه قوى و عدوانى .. و أوقات أحس بضعفه .. و فى لحظات حسيت أنه شهم ..
سمر فى دهشة :
- شهم !!!
نور :- صدقينى لو قلت لك كان نفسى مش يكون قاتل ..
سمر فى دعابة :
- أيه يا نور .. أنتى حبتيه ..
نور :- لا .. ازاى أحب مجرم ..
سمر :- و لو حسيتى أنه اتغير فعلا ..
نور :- واجبى أنى أسلمه للشرطة .. و العدالة تقول كلمتها ..



*********


فى اليوم التالى ذهب يوسف الى شقة نور .. و كم كانت سعادته لرؤيتها .. وما ان رأته نور حتى ابتسمت :

- مكنتش أعرف أنك ملتزم بمواعيدك كدة ..
يوسف :- طبعا .. طالما وعدتك يبقى لازم أوفى بوعدى .. ثم صمت .. و قد أحس بتغيرها بعض الشئ :
- نور .. أنتى خايفة منى ؟
نور :- أنا .. لا ..
يوسف :- أنا بعترف أنى كنت فى طريق مش كويس .. بس صدقينى دى مرحلة و انتهت من عمرى ..
نور :- يوسف .. أنا عمرى ما خفت منك ..
شعر يوسف بالسعادة :
- جاهزة عشان تكون رسالتك أحسن رسالة ..
نور :- يلا بينا .. ثم قامت بتشغيل المسجل دون أن يلاحظ ..



.........


بدأ يوسف فى رواية ماضيه .. و هو يظن بذلك أنه يساعد نور .. و لا يعلم أن هناك مسجل يقوم بتسجيل جميع ما ينطق به .. و قد نظر الى نور التى استعدت لكتابة بعض النقاط عنه :

- أنا اتولدت زى أى انسان عادى .. طفل برئ .. والدى كان مصرى .. و زى ما قلت لك قبل كدة أمى كانت ايطالية .. عاشت معانا فترة معينة .. و بعده كدة سافرت ايطاليا ..

:- زاد حبى لبابا جدا .. و كان كل حياتى .. و فجأة راح منى .. اتقتل .. ليه .. مش عارف .. كان عمرى وقتها تسع سنين .. كل اللى عرفته أنه اتقتل .. و أن اللى قتله واحد صاحبه و هرب .. و رغم أنى كنت صغير .. بس صورة اللى
قتله كانت دايما فى خيالى ..


:- أصبح حلمى كله انى اقتل اللى قتل بابا .. بس هو اختفى زى ما اختفت أيام الطفولة الحلوة ..

:- فاتت السنين .. و عمرى يكبر سنة ورا سنة .. و رغبتى فى الانتقام زى ما هى .. و بعد ما فقدت الأمل أنى مش هلاقيه .. بدأت أسرق .. كان كل همى أنى أجمع فلوس و أسافر لأمى فى أيطاليا ..

صمت قليلا بعدها أكمل :
- و فى مرة و أنا بسرق ضربت واحد .. مات .. كانت دى أول مرة أقتل فى حياتى .. و الغريب أنه مكنش قصدى .. بعدها هربت و كنت خايف وقتها أوى ..

و نور تكتب أمامه بعض النقاط .. و المسجل يقوم بتسجيل كل ما يتحدث به يوسف .. حتى أكمل :

- بعدها عرفت واحد اسمه حسام .. كان هربان هو كمان .. و ظروفنا زى بعض .. و حسام عرفّنى على منال .. اللى قابلتك .. و بقينا احنا التلاتة مع بعض دايما .. و بدأت احترف استخدام السلاح .. و كنت مميز جدا فى استخدامه ..

حتى قاطع حديثه صوت رنين هاتفه فنظر الى نور :
- نور .. أنا آسف .. مش هقدر أكمل ..
نور فى غضب مستتر :
- ليه ؟!!
يوسف :- أنا مضطر أسيبك دلوقتى ..
نور :- هتروح فين ؟
يوسف :- هتعرفى بعدين ..



*********


غادر يوسف دون أن يكمل حديثه .. أما نور فقد جلست لتستمع مرة أخرى الى ما قام المسجل بتسجيله .. و قد ارتسمت بسمة على شفتيها ..

بعدها استقلت سيارة .. و اتجهت الى ذلك المقدم الذى يدعى - أحمد سرور- , و يتولى قضية القبض على يوسف .. و قد اسمعته ما تم تسجيله .. و بعدما انتهى من سماعه .. نظر اليها فى سعادة ..

:- برافو عليكى يا نور .. فعلا أنتى بتثبتى أنك أشطر عميلة سرية ..
نور :- لولا المكالمة اللى جت له .. كان كمّل اعتراف ..
المقدم :- اطمنى .. احنا مراقبين خطواته .. خطوة .. خطوة ..
نور :- و امتى هيتقبض عليه ؟
المقدم :- بعد ما ينتهى من جميع اعترافاته .. و أكيد هتكون ليكى مكافأة من نوع خاص ..



*********


فى اليوم التالى .. ظلت نور تنتظر يوسف كى يأتى اليها ليكمل اعترافاته .. لكنه لم يذهب .. و ظلت فى انتظاره .. حتى ضاق بها الأمر فأخرجت هاتفها الخلوى .. و قامت بالاتصال به :
- يوسف ..
يوسف :- أهلا نور .. وحشتينى ..
نور :- يوسف .. أنت تعبان ؟
يوسف فى دهشة :
- لا .. ليه ؟!!
نور :- فين وعدك بقى أنك هتيجى عشان نكمل الرسالة .. بعد ما خلاص اعتمدت عليك ..
يوسف :- أنا مش هاجى النهاردة ..
نور فى غضب .. لكنها لم تظهره :
- أيه !!! .. ليه !!
يوسف فى ابتسامة و هدوء :
- فاكرة المطعم اللى قابلتك فيه أول مرة اعزمك على العشا ..
نور :- أيوة
يوسف :- قابلينى هناك النهاردة الساعة عشرة .. هناك مكان محجوز لينا ..

اندهشت نور .. لكنها وافقت حتى لا يشعر يوسف بشئ .. و عزمت على مواصلة تسجيلها لحديثه حين تقابله ..



*********


ذهبت نور الى ذلك المطعم الراقى فى تمام العاشرة .. و قد وصلت و وجدت يوسف فى انتظارها .. و يرتدى بذلة أنيقة ..و ما ان جلست .. حتى قامت بتشغيل المسجل دون أن يراها .. و نظرت اليه :

- احنا هنكمل كلامنا عن الرسالة هنا ..
يوسف فى ابتسامة :
- لا .. الرسالة هتتأخر شوية ..
نور :- ليه !!
يوسف :- احنا جايين نحتفل و بس ..
نور فى دهشة :
- نحتفل بـ أيه ؟!

ابتسم يوسف .. و قد أشار الى أحد العاملين بالمطعم .. بعدها ساد الظلام ذلك المطعم .. و قد أمسك يوسف بـ يدها .. و تحركا بضع خطوات فى ذلك الظلام .. حتى وقفا و عادت الاضاءة مرة أخرى .. فوجدت نور نفسها أمام طاولة .. توجد عليها كعكة كبيرة تتخللها الشموع .. و قد نظر اليها يوسف فى سعادة :

- كل سنة و أنتى طيبة ..
:- أنا بالصدفة .. و أنا فى شقتك شفت صورة قديمة ليكى .. و مكتوب عليها تاريخ ميلادك .. و حبيت أننا نحتفل بيه هنا ..
نور هائمة :
- ياه .. عيد ميلادى ..

بعدها قام كل من بالمطعم بالتصفيق .. و نور غير مصدقة لما يحدث .. و تنظر الى يوسف فى دهشة .. و تنظر الى عينيه التى غمرتهما السعادة .. حتى جلسا مرة أخرى ..

نور :- يوسف .. أنت اللى عملت كل ده ؟
يوسف :- أيوة ..
نور :- أنا نسيت ان عيد ميلادى النهاردة .. و عمرى ما تخيلت ان حد يفتكره .. أنت أول واحد يفتكره ..
يوسف :- أنا آسف أنى قطعت كلامنا امبارح عن الرسالة .. و سيبتك من غير ما أكملها .. بس كان لازم اتابع تجهيز الحفلة الصغيرة دى .. و ..
نور :- و أيه ؟
يوسف :- غمضى عينيكى ..

اغمضت نور عينيها .. و أخرج يوسف شئ مغلفا من معه .. بعدها طلب منها أن تفتح عينيها :
- دى .. هديتى ليكى ..

قامت نور بفتحها .. و قد وجدت عقدا جميلا :
- بس ده غالى أوى .. و أنت ..
يوسف :- و الله فلوسه حلال .. أنا مش هقولك جبت فلوسه منين .. بس و الله حلال ..
ابتسمت نور :
- تعرف أنك أول واحد يجيب لى هدية ..
يوسف فى دعابة :
- هو دايما أنا أول واحد كدة .. أنتى كنتى عايشة فى عزلة عن الناس و لا أيه ..
نور :- المرة دى فعلا أول واحد يفتكر عيد ميلادى .. و أول واحد يجيب لى هدية فى عيد ميلادى ..
يوسف :- طيب .. يلا بينا نكمل الرسالة ..
نور :- لا .. الرسالة نكملها بعدين .. و قد أغلقت المسجل ..
يوسف :- نور تعرفى ان حياتى أحلى بكتير من الأول .. و أحلى حاجة فيها أنى عرفتك ..


ابتسمت نور .. و واصلا حديثهما .. حتى ودعا بعضهما .. بعدها اتجهت نور الى صديقتها سمر ..
سمر فى دهشة :
- افتكر عيد ميلادك !!!
نور فى فرحة :
- تخيلى ..
سمر فى دعابة :
- انتى عملتى فى أيه بالظبط ؟
تنهدت نور :
- عشت أجمل لحظة فى حياتى النهاردة .. و مش عارفة ليه لما حب يكمل كلامه عن اعترافاته .. أنا رفضت .. و كان نفسى اللحظات دى تطول أوى ..
سمر :- و أيه العقد الجميل ده .. من فلوس القتل ..
نور :- قال لى ان فلوسه حلال .. و المرة دى حاسة أنه صادق ..
سمر :- و هتكملى اعترافاته امتى ؟
نور :- مش عارفة ... ثم نظرت اليها .. و ضحكت :
- لما يحب يعترف .. ابقى اسجل له ..



*********


فى اليوم التالى ذهبت نور الى المقدم أحمد سرور الذى طلب مقابلتها .. و ما ان رأته :

- حضرتك طلبتنى ؟
المقدم : أيوة .. اتفضلى ..
:- أنتى لازم تسجلى كل اعترافات المجرم ده بأقصى سرعة .. و خصوصا ان جرايمه بتزيد كل لحظة نتأخر فيها ..
نور فى دهشة :
- بتزيد !!!
المقدم :- أيوة .. امبارح حاول يقتل مسئول كبير .. و لحسن حظنا أن المسئول اتنقل للمستشفى فى الوقت المناسب .. و تم اسعافه .. بس الوزارة مقلوبة .. و مطلوب القبض عليه بأقصى سرعة ..
نور فى دهشة أخرى :
- امبارح ؟!!
المقدم :- أيوة .. الجريمة كانت حوالى الساعة عشرة ...

(الحلقة العاشرة)

زادت دهشة نور حين سمعت ذلك المقدم يخبرها بأن يوسف قد ارتكب جريمة بالأمس .. و حاول قتل احدى الشخصيات المهمة .. فنظرت الى المقدم فى دهشة :


- امبارح .. الساعة عشرة !!
المقدم :- أيوة
نور فى دهشة :
- بس ده كان ...
المقدم :- كان أيه ؟
نور :- هو حضرتك متأكد أنه هو ؟
المقدم :- أيوة متأكد .. و فيه ناس شافوه و هو بيهرب .. و وصفوا نفس صفاته .. و اتعرفوا على صورته .. و عشان كدة أنا بطلب منك أنك تحصلى على الاعترافات دى فى أسرع وقت ..


هزت نور رأسها دون أن تنطق .. و لا تزال الحيرة ترتسم على وجهها ..



*********



بعدها عادت نور الى صديقتها سمر .. و اخبرتها بما سمعته من المقدم أحمد سرور .. حتى أصيبت سمر بالدهشة هى الأخرى :


- بتقولى حاول يقتل شخص !!!
نور :- أيوة .. و فى نفس توقيت حفلة عيد ميلادى ..
سمر :- ازاى ؟!
نور :- مش عارفة ...
ثم صمتت نور .. و كأنها هائمة :
- بس هو كان معايا ..
سمر فى دعابة :
- أنتى متأكدة ان عيد ميلادك ده كان حقيقة .. و لاّ كنتى بتحلمى ..
نور :- أنتى بتهزرى .. طبعا كان حقيقة .. أمّال العقد ده أيه ..
سمر :- و المقدم ده متأكد ؟
نور :- قال ان فيه شهود وصفوه .. و اتعرفوا على صورته ..
سمر :- يعنى أيه .. فى أكتر من كاسانو !!
نور :- أنا خلاص تعبت من التفكير .. لما هو كان بيقتل أمّال مين اللى كان معايا .. ثم عادت مرة أخرى :
- معقولة يكون عيد الميلاد لعبة منه .. بس لما هى لعبة .. ليه يعترف بجرايمه ..
سمر :
- خلاص كملى تسجيل اعترافاته .. و تسلمى الاعترافات دى .. و دورك يكون انتهى ..
نور :- عندك حق .. أنا مهمتى الاعترافات و بس .. و هو كان قال لى ان بكرة هيكمل لى اللى بدأه ..



*********



فى اليوم التالى .. ذهب يوسف الى نور التى استعدت لتسجيل كل ما يخبرها به مرة أخرى .. و قد شعر يوسف تلك المرة بتغيرها بعض الشئ ..


يوسف :- نور .. انتى كويسة ؟
ابتسمت نور ابتسامة مصطنعة :
- أيوة ..
ثم نظرت اليه :
- يوسف .. أنت كنت فين قبل حفلة عيد ميلادى ؟
يوسف فى دهشة من سؤالها :
- كنت فى شقتى ..
نور :- و بعدها ؟
يوسف :- أيه يا نور .. ليه بتحسسينى أنك بوليس .. و بتحققى معايا ..
نور :- أنا آسفة .. بس أنت عارف أنا بخاف عليك جدا ..
ابتسم يوسف :
- طيب .. يلا نكمل الرسالة بسرعة .. لأنى منتظر تليفون ضرورى للأسف .. و ممكن أسيبك وقتها ..
نور فى غيظ :
- تليفون تانى !!
يوسف :- المرة دى مهم جدا .. يلا بينا ..



.........



أحضرت نور أوراقها .. و جلست بجواره لتدون حديثه .. و قد بدأ يروى :


- عرفت حسام و منال .. و بدأت احترف استخدام السلاح .. حتى قلبى بدأ يموت أكتر و أكتر .. خلاص ما أنا قتلت مرة مش هتفرق لما اقتل تانى .. و حسام يشجعنى .. و كان هو المخطط لعمليات القتل ..
- تقدرى تقولى كنا عصابة من تلات أفراد .. أنا اقتل .. و حسام يخطط .. و منال كانت بتساعدنى كتير بجمالها فى استدراج أهدافى ...


بعدها صمت يوسف قليلا ثم أخرج يوسف نفسا عميقا .. و نظر الى نور :


- تعرفى ليه أنا بحكى لكى كل ده ؟
نور :- عشان الرسالة ..
يوسف :- الرسالة مش هى السبب الرئيسى .. أنا كنت محتاج افضفض و أخرج اللى عندى .. عندى كلام كتير أوى محتاج حد يسمعه .. و ما صدقت لقيت انسان أثق فيه .. و أقول له كلام كفيل أنه يوصلنى للمشنقة ..


:- أنا عمرى ما قلت الكلام ده قبل كدة .. و مش هقوله لحد غيرك .. بس أنا بعتبره نوع من الاعتراف بالذنب عن فترة كان عقلى مغيب فيها ..


:- تعرفى .. كنت دايما بقول ان قلبى صخرة .. بس اكتشفت ان قلبى فيه طيبة محتاجة اللى يظهرها ..
:- أول ما شفتك بتغرقى لقيت نفسى بنقذك .. و صدقينى لو قلت لك أنا كنت مندهش من نفسى .. ازاى أكون قاتل .. و فى نفس الوقت أنقذ روح ..
:- نور .. أنا مش سئ أوى .. أنا محتاج اللى يمسح الغبار اللى عليا ..
ابتسمت نور :
- أنا عارفة أنك كويس .. و عمرى ما غيرت رأيي ..
ثم عادت لتناقض نفسها :
- يوسف .. أنت اتغيرت فعلا ..
يوسف :- أنتى لسة مش واثقة !! .. أنتى لكى الحق أنك تستغربى أنى اتغيرت فى لحظة .. بس صدقينى .. اللحظة دى كانت معايا زمن كامل .. و أكيد هيجى الوقت اللى تتأكدى فيه أنى اتغيرت ..


بعدها سمع رنين هاتفه الخلوى .. فنظر الى نور مبتسما :
- أنا كنت منتظر المكالمة دى .. ثم قام بالرد .. و نور تستمع الى ما يتحدث به .. حتى انتهى :


- انا مضطر أمشى حالا .. و نكمل الرسالة فى وقت تانى ..
نور وكأنها حزينة :
- هتروح فين ؟!
يوسف :- خليها مفاجأة .. أكيد هتبسطك ..
نور :- مفاجآتك كترت أوى ..



غادر يوسف شقة نور دون أن يخبرها الا القليل فى اعترافاته .. و قد استقل سيارته ذاهبا الى مكان ما .. أما نور فقد أثارتها الدهشة من تلك المكالمات التى دائما ما تأتى .. و تقاطع اعترافاته .. و بدأ الشك يتسرب اليها .. و تحدث نفسها :


- معقول .. تكون دى لعبة جديدة منه ..
:- ليه كل مرة تيجى المكالمة فى وقت الاعتراف ؟
:- هو فعلا واثق فيا زى ما بيقول .. و لا مخبى أيه بالظبط ؟!



*********



لم تمر ساعات حتى فوجئت نور بـ يوسف يعود اليها مرة أخرى .. و قد كانت السعادة ترتسم على وجهه ..


يوسف :- نور .. أنا قلت لك ان عندى مفاجأة , لما جت لى المكالمة ..
نور :- اه .. و سيبتى أفكر .. و تعبت من التفكير فى المفاجأة ..
يوسف :- أنا قلت لك قبل كدة .. ان واحد صاحبى طلب منى انى اشتغل فى شركة حراسات فى ايطاليا ؟..
نور :- اه ..
يوسف فى سعادة :
- أنا رفضت تماما .. و النهاردة لقيت شغل جديد ..
نور فى دهشة :
- شغل !!
يوسف :- أنتى عارفة أنى شاطر فى الرماية .. و رجل أعمال كبير شافنى فى النادى .. و طلب منى أنى أكون حارس شخصى لبنته اللى بيخاف عليها جدا ..
نور :- بودى جارد يعنى ؟
ضحك يوسف:
- أيوة بودى جارد بس من غير عضلات .. و هو هيتكفل بترخيص سلاح لى .. و أول ما يوصل الترخيص هبدأ شغلى الفعلى ..
نور :- يعنى أنت ممكن تقتل برضه ..
يوسف :- بس المرة دى هيبقى فى سبيل الحق .. و الدفاع عن النفس .. ثم نظر اليها فى حيرة :
- أنا ليه حاسس أنك مش مبسوطة .. أنتى أول حد أقول له الخبر .. ده أول مرة هشتغل .. و أكسب فلوسى بالحلال ..
نور :- أنا مبسوطة طبعا .. مبروك .. بس أوعى البنت دى تأكل عقلك ..
يوسف فى دعابة :
-لا .. عقلى خلاص عرف مين اللى أكله ..
نور :- و هتبدأ من امتى ؟
يوسف :- زى ما قلت لك .. وقت ما يوصل ترخيص سلاح لى .. يكون شغلى بدأ ..


بعدها واصلا حديثهما .. لكن سرعان ما غادر يوسف حين شعر بتأخر الوقت .. و شعوره بالارهاق فى آن واحد ..



*********



فى اليوم التالى .. طلب المقدم أحمد سرور مقابلة نور .. و قد ذهبت لمقابلته ..


المقدم أحمد :- نور .. وصلتى لـ فين فى الاعترافات ؟
نور :- بصراحة يا فندم مفيش جديد .. وقت اعترافه جت له مكالمة .. و خرج بعدها ..
المقدم فى غضب :
- نور .. أنا أعرف أنك شاطرة .. بس شكلى كدة هبدأ أغير رأيى ..
نور :- يا فندم ..
قاطعها و لا يزال غاضبا :
- أنا عاوز الاعترافات دى فى أسرع وقت .. فهمانى .. فى أسرع وقت ..


حتى قاطع حديثه رنين الهاتف المتواجد على مكتبه .. و بعدما انتهى من المكالمة .. نظر اليها :


- قلت لك .. كل لحظة هنتأخر فيها جرايمه هتزيد ..
أكمل :- جت لنا أخبار .. أنه ممكن ينفذ جريمة النهاردة ..
نور وكأنها مندهشة :
- هو أنا عندى سؤال ..
:- هو ليه متقبضش عليه بعد المرة اللى فاتت .. طالما فى شهود أكدوا انه هو ؟
المقدم فى حزم :
- ده شغلنا .. و عارفين احنا بنعمل ايه .. و كل حاجة لها وقتها ..
نور :- يعنى هتقبضوا عليه النهاردة ؟
المقدم فى غضب .. و قد لمع بريق عيناه :
- قلت لك ده شغلنا .. اهتمى أنتى بس بمهمتك ..



**********



عادت نور الى بيتها لكنها كانت فى اضطراب شديد .. و قلق .. لا تعلم مصدرهما .. فذهبت الى سمر .. و بالها ما زال منشغلا .. و قد أخبرت سمر بما أخبرها به المقدم أحمد سرور ..


سمر فى غرابة :
- و لما هو معروف كدة .. أنه حاول يقتل المسئول ده .. و هينفذ جريمة النهاردة .. ليه متقبضش عليه ؟
نور :- أنا سألت نفس السؤال ده .. و المقدم أحمد قال لى أنهم عارفين شغلهم .. و ان مهمتى الاعترافات و بس ..
:- أنا بقيت فى حيرة .. كنت الأول مش مصدقة أن يوسف اتغير .. بس بعد كدة بدأت أحس بتغيره فعلا .. و عمر ما احساسى كدبنى ..
و فى نفس الوقت .. مش عارفة ليه لما سألته هو راح فين بعد الحفلة .. حاول يغير الموضوع ..
صمتت سمر وبعد تفكير :
- ممكن يكون عنده انفصام فى الشخصية ..


صمتت نور هى الأخرى .. و مازالت الحيرة على وجهها .. حتى أخرجت هاتفها الخلوى .. لتحدث يوسف .. و ما ان قام بالرد :


- يوسف .. أنت فين ..
يوسف :- أنا فى شقتى ..
نور :- طيب ممكن أشوفك النهاردة ؟
صمت يوسف قليلا :
- للأسف .. النهاردة عندى حاجة مهمة لازم أعملها ..
نور :- حاجة أيه ..
يوسف :- نور .. أنا آسف هقابلك بكرة ..
نور مرة اخرى:
- طيب قول لى .. حاجة أيه ..


فجأة قطع الاتصال .. و كلما تحاول نور الاتصال به .. تجد هاتفه مغلقا .. فنظرت الى سمر :


- المقدم كان عنده حق ..
:- بيقول ان عنده حاجة مهمة .. و مش هيقدر يقابلنى ..
سمر فى دعابة :
- يا خسارة كنت افتكرت أنه اتغير .. وقلت أنك هتاخدى ثواب فيه ..
نور :- أنا لازم أمنع أنه يرتكب الجريمة دى ..
سمر :- بلاش تهور .. هتعملى أيه ..
نور :- سمر .. أنا ممكن هدفى الأول أنه يتقبض عليه .. بسبب الجرايم اللى عملها .. بس فى نفس الوقت عاوزاه يكون انسان تانى زى ما قال ..
سمر :- يا بنتى ده قاتل .. قاتل ..
نور :- أنا هروح لشقته .. و أحاول أعطله عن اللى هيعمله بأى طريقة ..
سمر :- نور.. بصراحة أنتى حبتيه ؟
نور :- مش عارفة .. بس أنا لازم أروح له ..



*********



استقلت نور سيارة صديقتها سمر .. و اتجهت الى مسكن يوسف حتى وصلت .. فوجدته يستقل سيارته مبتعدا عن مسكنه .. فتعقبته بالسيارة التى تقودها ...


تعقبت نور يوسف .. و لا تعلم لماذا تفعل كل هذا .. و كأن شئ بداخلها لا يريد أن يرتكب يوسف تلك الجريمة .. حتى شاهدته يوقف سيارته بالقرب من منطقة سكنية عشوائية .. و يترجل منها .. و بدأ يسير نحو تلك المنطقة .. فغادرت هى الأخرى السيارة .. و بدأت ترقبه من بعيد ..



.........



ظل يوسف يسير فى تلك المنطقة السكنية .. و لا يدرى أن نور تتبعه .. حتى وقفت قدماه أمام بيت قديم .. يبدو كالكهف فى صغره .. و نافذته المنخفضة التى تطل على الشارع الضيق .. و قد دخله .. و وجد ذلك العجوز الذى كان يصطاد فى فراشه .. و يبدو أنه فى اعياء شديد .. و قد نظر اليه يوسف فى حزن :


- أنا آسف أنى اتأخرت عليك يا حاج ..
أخرج العجوز ابتسامة رغم اعياءه الشديد :
- كفاية يا بنى أنك الوحيد اللى بتسأل عليا ..
يوسف :- لو تعرف الراحة اللى بحس بيها لما بكون معاك .. هتعرف أد ايه أنا مديون ليك .. ده غير دين الفلوس اللى أخدتها منك عشان اشترى العقد .. و أنا عارف أنها فلوس تعب سنين كتير .. و ربنا يقدرنى و أردهم لك من شغلى الجديد ..
العجوز فى ابتسامة :
- هعمل بيهم أيه .. اعتبرهم هدية منى ..


و نور تقف بجوار النافذة المنخفضة التى تطل على الشارع .. و تسمع بأذنيها حديثهما .. و أحيانا تشاهدهما بعينيها من خلال فتحات النافذة المتآكلة ..


العجوز فى تعب :
- يوسف .. انسى ماضيك ..
يوسف :- أنا بحاول أنساه ..
العجوز :- أنت لسة بتساعد اللى بتحبها فى رسالتها ؟
يوسف :- أيوة ..
العجوز :- كفاية اللى عرفته عنك .. و بلاش تكمل الرسالة ..
يوسف :- ليه .. أنا بحبها و بساعدها ..
العجوز :- مساعدتك ليها هتخلى ماضيك قدام عينيك طول عمرك .. هى لو بتحبك فعلا .. كانت رفضت أنك تحكى لها عن ماضيك .. ابدأ حياتك جديدة .. اوعى تكون زيي ..


يوسف ينظر اليه فى دهشة ..
أكمل العجوز :- أنا كنت زيك كدة فى شبابى .. بس أنا معرفتش أبدأ حياتى الا متأخر .. متأخر أوى .. تقدر تقول بعد فوات الأوان .. و أنت شايف حالى أهه بين الحياة و الموت .. مش عاوزك تكون زيى .. ثم بدأ اعياؤه يشتد ..


يوسف :- أنا لازم أنقلك مستشفى ..
العجوز :- لا .. سيبنى.. أنا هموت هنا .. و أكيد ريحتى هتفوح .. و الناس هتعرف أنى مت ..
يوسف :- أنا مقدرش أسيبك و أنت تعبان كدة ..
العجوز :- اسمع بس الكلام اللى أنا قلته لك .. و ارجوك سيبنى .. محتاج أكون لوحدى ..



*********



غادر يوسف بعد الحاح العجوز على رحيله .. لكنه لم يلاحظ وجود نور التى تأثرت كثيرا بذلك العجوز .. حتى تلقت اتصالا من ذلك المقدم .. يطلب منها الذهاب اليه مرة أخرى .. و على الفور اتجهت اليه ..


المقدم :- للأسف .. زى ما توقعنا .. المجرم ارتكب جريمة تانية من ساعة ..
نور فى دهشة :
- مجرم مين ؟!
المقدم :- كاسانو ..
نور :- كاسانو مين ؟!
المقدم فى غضب :
- نور .. أنتى مش طبيعية ليه .. المجرم اللى هنسلمه للشرطة ..
نورفى تعجب :
- قتل الضحية .. و الشرطة كانت عارفة ؟!!
المقدم :- كان عندنا شك أن الجريمة كانت ممكن تحصل .. بس قدر يخدعنا .. و ينفذها و يهرب ..
نور :- يا فندم .. كاسانو برئ من الجريمة دى ..
المقدم فى غضب .. و قد ارتفع صوته :
- نعم ؟!!
نور :- أيوة يا فندم .. كاسانو من ساعة كان معايا ..
اشعل سيجارته .. و مازال الغضب يظهر عليه :
- لا .. لا .. لا .. مش عاوز اسمع الكلام ده خالص .. كاسانو هو اللى حاول يقتل المسئول من كام يوم .. و النهاردة هو اللى قتله ..
نور :- يا فندم .. أنا متأكدة ..
المقدم فى هدوء :
- نور .. ده مجرم .. و يتحمل نتيجة جرايمه .. خلاص كل الشهود أكدوا ان هو القاتل .. و مش عاوز أسمع تانى .. أنه كان معاكى من ساعة ..
نور :- ليه ؟!
المقدم :- اسألتك كترت أوى يا نور .. أنتى لكى مهمة معينة .. تنفذيها و بس ..
نور فى صوت منخفض :
- تحت أمرك يا فندم ... ثم غادرت ..



*********



غادرت نور .. و قد سقطت بعض دموعها .. و عادت الى صديقتها سمر مرة أخرى ..
نور :- أنا فهمت اللعبة ..
سمر فى دهشة :
- لعبة أيه ..
نور :- أقولك أيه اللعبة .. يوسف يقدم اعترافات بالجرايم اللى عملها .. و لحد ما يقدم اعترافاته .. أى جريمة ترتكب .. و القاتل مش معروف .. يكون يوسف هو اللى ارتكبها .. و بكدة تكون الشرطة بتقوم بواجبها .. و طبعا مين اللى هيصدق أنه برئ من الجرايم دى .. بعد اعترافاته أنه مجرم و قاتل ..


سمر :- بس ممكن يكون هو القاتل فعلا ..
نور :- لا .. أنا النهاردة اتأكدت مليون فى المية أنه برئ .. و اتأكدت هو بقى انسان أد أيه ..
سمر :- و ناوية تعملى أيه ؟


صمتت نور قليلا .. بعدها ........

(الحلقة الحادية عشر)

غادرت نور .. و قد سقطت بعض دموعها .. و عادت الى صديقتها سمر مرة أخرى ..
نور :- أنا فهمت اللعبة ..
سمر فى دهشة :
- لعبة أيه ..
نور :- أقولك أيه اللعبة .. يوسف يقدم اعترافات بالجرايم اللى عملها .. و لحد ما يقدم اعترافاته .. أى جريمة ترتكب .. و القاتل مش معروف .. يكون يوسف هو اللى ارتكبها .. و بكدة تكون الشرطة بتقوم بواجبها .. و طبعا مين اللى هيصدق أنه برئ من الجرايم دى .. بعد اعترافاته أنه مجرم و قاتل ..


سمر :- بس ممكن يكون هو القاتل فعلا ..
نور :- لا .. أنا النهاردة اتأكدت مليون فى المية أنه برئ .. و اتأكدت هو بقى انسان أد أيه ..
سمر :- و ناوية تعملى أيه ؟


صمتت نور قليلا .. بعدها نظرت اليها :
- أنا مش هسجل اعترافاته تانى ...
سمر فى دهشة :
- أيه ؟!!!
نور .. و كأنها تتذكر :
- أنا لما رسمت خطتى .. و نجحت و بدأ يعترف .. كان هدفى أنه يتعاقب على جرايمه .. أما إن الاعترافات دى تكون سبب فى إنه يتعاقب على جرايم هو برئ منها .. يبقى كدة احنا اللى بنظلمه ..
سمر :- بس دى مهمتك .. و ده مجرم و لازم ياخد عقابه .. مش ده كان كلامك ..
نور :- فعلا كان كلامى .. بس لما حسيت أنه اتغير .. و سمعت كلامه مع العجوز اللى كان عنده .. قلت ليه احنا مش بنسامحه .. ده ربنا بيسامح ..



*********



فى الوقت ذاته .. لم ينعم تفكير كل من حسام و منال بالهدوء .. و لا يزالا يفكران فى عودة يوسف اليهما مرة أخرى .. و قد أصابهما الغيظ حين فشلت محاولة منال .. عندما أخبرت نور بحقيقة يوسف .. لكنهما لم يفقدا الأمل فى عودته ..


حتى جاء اليوم حين عاد حسام الى منال .. و قد ارتسمت السعادة على وجهه :


- جت اللحظة اللى يرجع فيها كاسانو ..
منال :- خلاص .. كاسانو اتغير .. و مش هيرجع تانى ..
حسام :- بس دى اللحظة اللى كان مستناها طول عمره ..
نظرت اليه منال فى ترقب ..
أكمل :- كاسانو كان بيحلم طول عمره أنه ينتقم من اللى قتل أبوه و هرب ..
:- أنا بالصدفة شفت النهاردة الرجل ده .. و عرفت عنه كل حاجة ..
منال :- و أنت ازاى عرفت أنه هو ؟
حسام :- كاسانو كان محتفظ بصورته .. هى كانت قديمة أوى .. بس ملامحه زى ما هى ..
منال :- و افرض إن فكرة الانتقام دى .. خلاص نساها ..
حسام :- أنا اكتر واحد أعرفه .. و أعرف أد أيه هو كان مستنى اللحظة دى .. بس فى حاجة لازم نعملها ..
منال :- حاجة أيه ؟
حسام :- المرة اللى فاتت محاولتنا فشلت لما نور عرفت حقيقة كاسانو .. عشان كدة المرة دى لازم نبذل مجهود أكبر .. و نلاقى ثغرة عند نور .. نقدر نبعد بها كاسانو عنها ..



*********



أما نور فمازالت تتحدث الى سمر :
- أنا لازم أبعد عن يوسف ..
سمر فى تعجب :
- تبعدى عنه !!
نور :- اه .. خايفة اتعلق بيه أكتر .. و خايفة يتعلق بيا أكتر من كدة .. و لو عرف الحقيقة يرجع زى ما كان ..
سمر :- دلوقتى أنا أقدر أقولك .. أنك حبتيه .. و أنا متأكدة ..
نور :- أيوة حبيته .. بس عارفة نهاية الحب ده أيه .. الفشل ..


ثم ضحكت .. و كأنها تسخر من نفسها :
- كانت خطتى أساسها أنى أوقعه فى حبى .. و قدرت أحقق نجاح باهر .. بس قدر هو كمان يخلينى أحبه ..
سمر :- بس هو ممكن يرجع مجرم تانى لو بعدتى عنه ..
نور :- عشان كدة أنا خايفة من قرارى ده .. بس فى نفس الوقت عاوزة أثبت لنفسى .. أنه اتغير عشان نفسه هو .. مش عشان انسان تانى .. حتى لو كان الانسان ده .. أنا ..


بعدها سمعت رنين هاتفها الخلوى .. فنظرت الى سمر :
- هو ..
سمر :- ردّى ..


لم تقم نور بالرد .. حتى قام يوسف بالاتصال مرة أخرى .. فقامت بالرد تلك المرة ..


يوسف :- الو .. نور .. أنتى فين ؟
نور :- أهلا يوسف .. أنا عند صاحبتى ..
يوسف :- أنا قلقت عليكى .. و آسف لما كلمتينى المرة اللى فاتت .. التليفون حصل فيه عطل ..
نور :- عادى .. و لا يهمك ..
يوسف :- نور .. أنا حاسس أنك متغيرة ..
نور :- لا .. أنا كويسة ..
يوسف فى سعادة :
- أنا من بكرة هستلم شغلى الجديد .. رجل الأعمال اللى هكون حارس لبنته .. خلاص رخص لى سلاح ..
نور :- مبروك ..
يوسف :- الفترة اللى جاية هكون مشغول .. بس فى أقرب فرصة أكيد هقابلك ..
نور :- إن شاء الله ..


بعدها صمتت .. و كأن صراع يوجد بداخلها ..
:- يوسف .. ثم صمتت مرة أخرى ..
يوسف :- نعم ..
نور :- خد بالك من نفسك ..
ابتسم يوسف :- أكيد .. أنتى كمان خدى بالك من نفسك ..



بعدما انتهت المحادثة .. نظرت الى سمر .. و تساقطت بعض دموعها :
- مقدرتش أقول له .. أنى لازم أبعد عنه ..
:- حسيت أنه فرحان .. خفت أضّيع فرحته ..
ثم مسحت دموعها :
- أكيد شغله الجديد هيشغله .. و وقتها ألاقى سبب مقنع أبعد عنه بسببه ..



*********



فى اليوم التالى .. ذهب يوسف لمقابلة رجل الأعمال و ابنته .. ليبدأ عمله الجديد .. و قد أحسن ذلك الرجل استقباله :


- أنت من النهاردة واحد مننا .. كفاية أنى بأمنك على بنتى الوحيدة ..
يوسف :- إن شاء الله أكون عند حسن ظن حضرتك ..
أكمل الرجل :- بنتى يارا هتلاقيها هادية جدا .. و مطيعة لأقصى درجة .. بس أنا خصومى كتير .. و الزمن ده زمن صعب .. بيحصل فيه كل حاجة ..
:- أنا عارف أنك متميز فى التصويب .. و الرماية .. بس المسدس اللى معاك ده حقيقى .. يعنى مش لعبة .. ممنوع أنك تستخدمه الا فى الضرورة القصوى ..
يوسف :- أكيد ..
أكمل الرجل :
- يارا عايشة برة مصر مع مامتها .. و هى فى زيارة هنا شهرين .. أنت فى الفترة دى هتعيش معانا فى الفيلا .. و هتكون أجازتك فى نهاية كل أسبوع ..


بعدها جاءت ابنته .. و قد أشار اليها :
- دى يارا .. حياتى كلها ..
ثم أشار الى يوسف :
- يوسف .. هيكون معاكى الشهرين دول ..
:- أنا بقى أسيبكم تتعرفو على بعض أكتر ... ثم غادر ..


يارا :- أنت أول مرة تشتغل بودى جارد ؟
يوسف :- أيوة ..
يارا :- أنا عاوزاك تعتبرهم شهرين ترفيه .. أنا عن نفسى بحب البيت أكتر .. و مش بخرج كتير .. بس أعمل أيه .. بابا بيخاف عليا جدا ..
يوسف :- بس حضرتك عايشة برة مصر .. و لازم تخرجى تشوفى مصر و جمالها ..
ضحكت يارا :
- لا .. أنا اتربيت هنا .. و خلصت دراستى كلها هنا .. و سافرت بعدها أعيش مع ماما ..
يوسف :- اه ..
يارا :- بابا قال أنك هتعيش معانا هنا ..
يوسف :- أيوة ..
يارا :- أنت متجوز ؟ ..
ضحك يوسف :
- لا .. بس بفكر ..


ضحكت يارا .. و ضحك يوسف .. و قد شعر يوسف بالسعادة من البداية الموفقة لعمله .. و تلك الفتاة التى تمتلك الكثير من الهدوء و البراءة ..



*********



بعد مرور أيام .. قضتها نور فى التفكير .. و قد قررت الذهاب الى المقدم أحمد سرور .. و ما إن رآها :


- فيه اعترافات جديدة ؟
نور :- لا .. يا فندم ..
المقدم :- ليه ؟
صمتت نور قليلا :
- أنا جيت لحضرتك النهاردة .. عشان أطلب اعفاءى من المهمة دى ..
المقدم فى دهشة :
- أيه ؟!!!
نور فى حزن :
- أنا مش هقدر أكمل ..
المقدم :- ليه ؟
نور :- أنا مش مؤهلة للمهمة .. و بعترف بفشلى يا فندم ..
المقدم :- بس أنتى بدأتى .. و لازم تكملى .. احنا مش بنلعب ..
نور :- صدقنى حضرتك .. أنا فكرت كتير فى القرار ده .. و اكتشفت إن بقاءى فى المهمة مش هيفيدها .. و لازم انسحب منها .. و ده قرار نهائى .. أنا هطلب تكليفى بمهمة تانية ..



شعر المقدم بغضب شديد .. و قد أمر نور بالانصراف .. و قد خرجت .. و ظلت تتحدث الى نفسها :


- يا ترى اللى عملته ده صح ؟..
:- أول مرة فى حياتى أحس أنى ضعيفة أوى كدة ..
:- أنتى حبتيه فعلا .. عشان كدة خفتى تكونى السبب فى دخوله السجن .. و لاّ خفتى عليه من ظلم المقدم ؟ ..
:- اعترفى يا نور أنك حبتيه .. لا .. لا .. مش حب .. ده خوف عليه ..
:- سواء كنت بحبه .. أو خايفة عليه .. لازم أبعد عنه بأى طريقة .. حتى لو جرحته جرح مرة أحسن جرح العمر كله ..


و ظلت تحدث نفسها .. حتى أصابها التعب من كثرة ما تفكر به ..



*********



تمر الأيام .. و كلما يحاول يوسف الاتصال بـ نور .. لا تجيب .. و قد شعر بالقلق .. و لا يعلم أن نور لا تجيب عمدا .. حتى شعرت يارا بـ قلقه ...


يارا :- يوسف .. أنت متغير ليه ؟
يوسف :- أنا كويس ..
يارا :- لا .. بجد أنت متغير ليه ؟
يوسف :- البنت اللى بحبها .. و ناوى أطلبها للجواز .. كل ما أحاول اتصل بيها مش بترد عليا .. و أنا قلقان عليها .. خايف يكون حاجة حصلت لها ..
يارا :- أنت بتحبها للدرجة دى ؟
يوسف :- و أكتر كمان .. دى حياتى كلها ..
يارا فى بسمة :
- يا بختها .. أنها لقت انسان زيك يحبها ..
:- أكيد هى جميلة أوى ..
يوسف :- أنا مرة صّورتها من غير ما تعرف .. ثم أعطى يوسف هاتفه الخلوى لـ يارا .. كى ترى صورة نور ..


يوسف :- هى دى صورتها ..
يارا فى دهشة :
- نور !!!

نظرت يارا الى يوسف فى دهشة :
- ازاى تنقذ نور من الغرق .. و نور كانت بطلة سباحة و غطس ؟!!
يوسف فى دهشة أكبر :
- أيه !!! بطلة سباحة و غطس !!!
يارا :- اه .. ده كان معروف عنها إنها كانت تقدر تفضل تحت الميا فترة طويلة .. لدرجة أنك تصدق إنها غرقت فعلا ..

هنا صمت يوسف .. و تذكر حين أنقذها من الغرق عندما التحق بالقارب .. و المرة الأخرى حين ألقت بنفسها فى حمام السباحة .. و كيف ظلت تحت الماء لفترة قبل أن ينقذها .. و حين أنقذها لم يبد عليها أى تعب .. و كأنه يقول لنفسه :

- معقول !!
يارا بعدما صمت يوسف :
- أنت رحت فين ؟!
يوسف :- يارا .. أنتى متأكدة من كلامك ده ؟
يارا :- اه طبعا .. نور كانت معروفة فى المدرسة إنها بطلة سباحة .. و إ نها عاقلة جدا .. عاقلة بدرجة غريبة ..
يوسف :- عاقلة ؟!

و يوسف يتذكر ما كانت تفعله نور أثناء مهمة شرم الشيخ .. و قد بدأ الشك يتسرب الى نفسه .. و قد تذكر أشياء لم يلاحظها من قبل .. و يسأل نفسه :

- هو ليه أنا الوحيد اللى أنقذتها فى القارب .. و فى الحفلة ؟
:- و صدفة أنها تكون معايا فى نفس الفندق .. و ازاى معاد سفرها من هناك فى نفس معاد سفرى .. و ازاى تسافر معايا من غير ما تعرف مين أنا , اذا كانت عاقلة جدا زى ما بتقول يارا .. و الرسالة .. اه الرسالة ..

يارا و قد اندهشت من صمته مرة أخرى :
- يوسف .. أنت سرحت تانى .. أيه حكايتك النهاردة ؟!!
يوسف :- يارا .. بعد اذنك .. أنا لازم أروح مكان حالا ..
يارا :- هتروح فين ؟
يوسف :- هقولك بعدين .. بس أنا محتاج عربيتك ..
يارا :- عادى خدها .. بس حاول ترجع قبل ما بابا يجى عشان متحصلش مشاكل ...



*********


استقل يوسف سيارة يارا .. و لم يلاحظه من يراقبه من رجال الشرطة .. و قد ظنوا أنه السائق الخاص بـ يارا .. و قد أسرع يوسف و ذهنه مازال مشتتا .. و عقله منشغلا بأفكار كثيرة .. يكاد صراعها أن يحطم رأسه ..

حتى اتجه الى كلية الآداب التى أخبرته نور من قبل أنها قد أكملت بها دراسة علم النفس .. و تقوم هناك بتحضير رسالتها عن السلوك المرضى للقاتل ..
وما إن وصل الى هناك حتى اتجه الى قسم الدراسات العليا بالكلية .. و قد وصل الى ذلك القسم و وجد أحد الموظفين ..

يوسف :- لو سمحت .. أنا عاوز اسأل عن رسالة بتحضرها خريجة من الكلية هنا .. اسمها نور محمد بدران ..
الموظف :- و انت حضرتك مين ؟
يوسف :- أنا قريبها .. و كنت عاوز أعرف ميعاد مناقشتها امتى .. ثم أخرج نقودا من معه .. و أعطاها للموظف ..

قام الموظف بالبحث كثيرا .. و يوسف ينتظر .. و كأنه يعلم ما سيخبره به الموظف .. و بعد فترة ليست بالقليل .. عاد اليه الموظف :

- مفيش عندنا خريجة بالاسم اللى حضرتك قلت عليه بتحضر أى دراسات عليا ..
يوسف :- أنت متأكد !!
الموظف :- أيوة ..
يوسف :- أرجوك .. اتأكد تانى ..
الموظف :- حضرتك أنا متأكد .. و مفيش عندنا حد بالاسم ده بيحضر رسالة ..
يوسف :- شكرا ..



*********


غادر يوسف بعدما اكتشف أن نور كانت تخدعه .. و لا تقوم بتحضير تلك الرسالة .. ويتحدث الى نفسه :

- معقول .. نور !!!
:- غرقت ازاى .. و هى بطلة سباحة ؟
:- قلت عليها مجنونة .. ازاى و يارا بتقول أنها كانت عاقلة جدا ..
:- رسالة .. و مفيش رسالة ..
:- أمّال الكلام اللى كنت بقوله ده .. كان بيروح فين ؟




.........


بعدها استقل يوسف سيارة يارا حتى وصل بالقرب من مسكن نور .. فوجدها تستقل سيارة أجرة فتبعها ..
يوسف لنفسه :- يا ترى على فين يا نور ؟

حتى وجد تلك السيارة التى بها نور تقف .. و قد ترجلت نور .. حتى استقلت سيارة أجرة أخرى .. و يوسف لا يندهش .. فما اكتشفه ذلك اليوم لا يجعل الأمر مدهشا .. و قد تبع السيارة الأخرى حتى فوجئ بتلك السيارة تقف أمام مديرية أمن القاهرة .. و نور تترجل منها .. و تدخل الى ذلك المبنى الضخم .. و قد زادت مفاجأته حين وجد شخصا يخرج من المبنى .. و قد صافحها .. أنه الشخص الذى كان هدفه فى شرم الشيخ .. و فى حفلة الأوبرا .. و هنا أدرك يوسف كل شئ ..



..........


اتجهت نور الى داخل المبنى .. و قد طلبت مقابلة ذلك اللواء الذى اكتشف موهبتها و طلب منها أن تعمل مع الشرطة .. وما إن قابلها حتى رحب بها :
- أهلا نور .. عرفت أنك طلبتى تقابلينى ..
نور :- أيوة يا فندم ..
اللواء :- أنا عرفت أنك اعتذرتى عن المهمة الاخيرة .. و المقدم أحمد زعلان جدا ..
نور :- يا فندم .. أنا جيت النهاردة علشان أقدم اعتذار نهائى عن العمل ..
اللواء :- أيه !!! .. اعتذار نهائى ؟!
نور :- أيوة يا فندم .. أنا خلاص مش هقدر أكمل ..
اللواء :- ليه ؟! .. أنتى موهوبة جدا ..
نور :- أرجوك يا فندم أقبل اعتذارى ..
اللواء :- نور .. أنتى عرفتى أسرار مهمة جدا .. و نضمن منين أنك هتحتفظى بيها ؟
نور :- اطمن يا فندم .. أى حاجة عرفتها خلاص اتمسحت من ذاكرتى ..
اللواء :- نور .. أنتى فكرتى كويس ؟
نور :- أيوة يا فندم .. فكرت كتير .. و خلاص ده قرارى ..



*********


مازال يوسف بداخل سيارة يارا .. و الغضب يتملك منه بعدما تأكد من خداع نور له .. و يتحدث الى نفسه :

- أنا اللى كنت مفكرها مجنونة .. و أنا المغفل الكبير ..
:- كنت بقول إنها أكتر انسانة وثقت فيها .. و هى اللى بتحضر لى حبل المشنقة .. حتى سمع رنين هاتفه ..

صوت حسام :- يوسف .. مفيش وقت .. أهرب بسرعة .. نور طلعت بوليس ..
و يوسف صامتا .. لا يتحدث ..
حسام :- البوليس قبض على منال .. و أنا عرفت أهرب بأعجوبة ..
يوسف :- قبض على منال ؟!
حسام :- أيوة .. يوسف .. لازم ترجع كاسانو من جديد ..
صمت يوسف :
- حسام .. فين المعلومات اللى جمعتها عن اللى قتل أبويا ؟
حسام :- المعلومات كلها على إيميلى أنا .. أنت عارف كلمة سر ايميلى .. أنا حاطط هناك كل المعلومات عنه .. و أنه هيكون موجود فى بيته النهاردة .. و دى أحسن فرصة ..
يوسف :- أنت كان عندك حق يا حسام .. أنا هنفذ العملية ..
حسام فى سعادة :
- أنت كدة كاسانو اللى أنا أعرفه ..


انتهت المكالمة .. و قد أغلق حسام الخط .. ثم نظر مبتسما الى من بجواره :

- أنا كدة عملت اللى عليا .. و سلمته لكم .. هيحاول يقتل اللى قتل أبوه النهاردة .. و أنتو عارفين المكان ..
المقدم أحمد سرور فى سعادة :
- و أنا عند وعدى لك .. ثم ضحك :
- زى ما أنت قلت .. أنت عرفت تهرب مننا ..



*********


مرت ساعات .. و قد حل الليل و حصل يوسف على المعلومات التى قام حسام بتحضيرها عن قاتل أبيه .. و التى وضعها على البريد الالكترونى الخاص به ..

تأهب يوسف لينفذ تلك الجريمة .. و معه ذلك السلاح الذى قام بترخيصه رجل الأعمال والد يارا .. و قد استقل سيارة يارا متجها الى مسكن من يريد أن يقتله .. و قوات الشرطة يتقدمهم المقدم أحمد سرور يستترون و ينتظرون وصوله .. و قد أمرهم بأن يقتلوه اذا حاول الهروب ..

تسير السيارة .. و القوات تتأهب .. و نور تجلس فى قلق لم ينتابها من قبل .. تريد أن تمسك بهاتفها الخلوى و تتحدث الى يوسف .. و لكنها تتردد .. و يوسف يملأ قلبه الغضب .. و تتقدم السيارة أكثر .. و أكثر .. حتى أوقف السيارة فجأة .. و صرخ الى نفسه :

- لا .. لا يا يوسف .. أنت اتغيرت ..
:- لا .. مش هترجع سمكة كبيرة .. تاكل الضعيف تانى ..
يصرخ الى نفسه بصوت عالى :
- مش هتقتل تانى ..
:- أنت اتغيرت عشان نفسك أنت ..

ثم استدار بالسيارة .. و قد اتجه الى نور .. و ما إن وصل اليها و رأته .. نظرت اليه فى فرحة :

- يوسف ..
و يوسف صامت ...
نور :- يوسف .. أنت ساكت ليه ؟
يوسف :- أنا جيت عشان أسألك سؤال واحد .. و مش خايف من حبل المشنقة ..
نور وكأنها مندهشة :
- أيه ؟!! حبل المشنقة ؟!!
يوسف :- سؤالى .. انتى حبتينى فعلا ؟ .. و لاّ حبك ده كان تبع الخطة ..
نور :- خطة أيه ؟
صاح يوسف .. و ارتفع صوته فى غضب :
- نور .. أنا اكتشفت كل حاجة .. أنا عرفت مين نور الحقيقية .. نور بطلة السباحة نور .. نور فتاة الشرطة الشاطرة ..
ثم صمت ..
أكمل :- أنا عارف إن البوليس هيجى فى أى لحظة بس مش فارقة معايا .. أرجوكى جاوبى سؤالى .. انتى حبتينى .. و لا لأ ؟
صمتت نور ثم جلست .. و وضعت رأسها بين يديها :

- أنا خلاص قدمت استقالتى عن العمل مع الشرطة .. لأنى اكتشفت أنى مبقدرش اتحكم فى عواطفى ..

صمتت قليلا و كأنها تتذكر :
- للأسف كانت مهمتى أنى أسلّمك للشرطة .. جه واحد و اعترف أنه بعت ايميل لقاتل عشان يقتل صاحبه .. يعنى تقريبا حس بالذنب .. و كانت المشكلة إن مفيش حد يعرف مين أنت ..
- فكرنا كتير ازاى نقدر نعرف مين أنت .. بعتنا لك ايميل بصورة هدف .. و حطينا مقابل كبير .. و المكان حددناه .. شرم الشيخ .. حتى القارب حددناه .. و كان كل اللى على القارب من الشرطة .. و انتظرنا الشخص الغريب اللى هو القاتل ..
- أول ما أنت ركبت القارب .. أنا شكيت .. و قلت مش معقولة يكون شخص فى وسامتك قاتل .. بس مفيش حد تانى غيرك كان موجود .. و الخطة اكتملت زى ما حصل معاك بالظبط سواء فى شرم الشيخ .. أو فى حفلة الاوبرا ..

أكملت فى دموع :
- بس الغريب أنى حبيتك فعلا .. و كل ما أحاول أقول أنه مش حب .. أعرف أنى بضحك على نفسى .. و أنى محبتش حد غيرك .. عشان كدة اعتذرت عن أنى أكمل المهمة .. و طلبت منك أنك تبعد عنى ..

يوسف :- رغم أنى حاسس بالمغفل .. أنا مش ناسى لكى الجميل .. أنك كنتى أحد الأسباب فى تغييرى .. حتى لو لفيتى حبل المشنقة على رقابتى .. كفاية أنك انقذتينى من نفسى كتير اوى حتى لو مش قاصدة ..



*********


أما المقدم أحمد سرور .. فقد ضاق به الانتظار فيوسف لم يذهب لقتل ذلك الرجل .. حتى جاءه اتصال عبر جهاز اتصاله اللاسلكى من أحد مساعديه .. يخبره بأن هناك من شاهد يوسف يتجه الى شقة نور ..

المقدم :- نور ..

بعدها أخرج هاتفه الخلوى .. و قام بالاتصال بـ نور .. و عندما وجدت نور هاتفها الخلوى يشير الى اتصال المقدم .. استأذنت من يوسف .. و قامت بالرد و كأنه صديقة لها .. و استمعت الى المقدم الذى يقول :

- حاولى تعطليه على أد ما تقدرى .. احنا فى الطريق .. ثم أغلق الخط